Миржалол Қосимов: Шомуродовнинг ўйини қониқарсиз. У ўз устида ишлашни пасайтириб юборди

«Бунёдкор» — «Қўқон-1912» клублари ўртасидаги учрашувдан сўнг мезбонлар бош мураббийи Миржалол Қосимов ҳужумчи Элдор Шомуродов ҳақида берилган саволга қуйидагича жавоб қайтарди:

Элдор Шомуродовнинг ўйини қониқарсиз. Авваламбор, у иқтидорли футболчи. Индивидуал жиҳатдан кучли. Аммо бу йилги ўйинларида анча пасайиш бор. Бунда унинг омади чопмаяпти демаган бўлардим. Шомуродов ўз устида ишлашни пасайтириб юборди. Балки хаёли четга кетишдадир. Футболчи шартномаси тугагунга қадар ўйнаб бериши керак. Футболни мажбуран ёки таниш-билишчилик эвазига ўйнатиб бўлмайди.

Яқинда унга статистикани кўрсатдим, ҳужумчи учун гол муҳим. Шомуродов эса жорий мавсум чемпионатда ҳали бирорта гол ургани йўқ. Имкон қадар у билан алоҳида гаплашиб, ҳолатини яхшилашга ҳаракат қиляпман. Умид қиламанки, давралар оралиғида ўз спорт формасини тиклайди ва иккинчи давра ўзини яхши томондан кўрсатади.

Миржалол Қосимов, «Бунёдкор» бош мураббийи

Таркибда 16—17 ёшли футболчи йўқ. 20 ёшдан ошган футболчини эса ёш дейишни бас қилиш керак. Таркибдаги футболчиларимизнинг барчаси қизлар билан гаплашадиган бўлган, энди уларнинг нимаси ёш? Оддий мисол сифатида мана «Аякс»ни олиб қаранг. Булар аллақачон улғайиши лозим.

Миржалол Қосимов, «Бунёдкор» бош мураббийи

Қизиқарли, шиддаткор ва жанговор ўйин гувоҳига айландик. Бу каби учрашувлар мухлисларга ёқади, улар сифатли футбол кўришди. Қўқондан ташриф буюрган мухлислар гарчи уйларига тушкун кайфиятда қайтаётган бўлса-да, футболдан завқ олишди, деб ўйлайман, уларга катта раҳмат.

Ўйинда кўплаб вазиятлар яратдик. Лекин улардан фойдаланиш даражаси паст. Бугун чизиқлар орасида бўшлиқ юзага келди. Айрим футболчилар терма жамоа ихтиёридан етиб келгани боис бироз толиқиш кузатилди. Бу футболда бўлиб турадиган нарса.

«Қўқон-1912» жуда яхши жамоа. Ҳасанов ажойиб таркибни шакллантирмоқда, яхши футболчилар йиғилган. Легионер ҳужумчи Раевац ҳам яхши имкониятларга эга экани кўринди.

Миржалол Қосимов, «Бунёдкор» бош мураббийи