Тошкент шаҳар Бектемир туманидаги ЙПХда марихуана гиёҳвандлик моддаси олиб кетаётган фуқаро қўлга олинди. Бу ҳақда Тошкент шаҳар ИИББ расмий сайти хабар берди.
Хабарда маълум қилинишича, 2017 йилнинг 12 июнь куни тахминан соат 16:50 ларда, Тошкент шаҳар ИИББ ходимлари томонидан, Бектемир туманидаги ЙПХ масканида, Lacetti русумли автоулов кўздан кечирилганда, ҳайдовчи Азизбек Маҳмуд ўғли Ёқубов ёнида оғирлиги 2,73 грамм бўлган марихуана гиёҳвандлик моддаси сақлаб келаётганлиги аниқланган.
Мазкур ҳолат юзасидан Бектемир тумани ИИБ ҳузуридаги Тергов бўлими томонидан Ўзбекистон Республикаси ЖКнинг 276-моддаси 1-қисми (гиёҳвандлик воситаларини ўтказиш мақсадини кўзламай, қонунга хилоф равишда сақлаш) аломатлари билан жиноят иш қўзғатилган.
Ҳозирда дастлабки тергов ҳаракатлари давом эттирилиб, унинг бошқа жиноятларга алоқадорлиги текширилмоқда.
Изоҳ (0)