Fomalhaut энг яхши корейсча қўшиқ ижроси танлови Гран-присини қўлга киритди

Fomalhaut гуруҳи Олтинчи энг яхши корейсча қўшиқ ижроси танлови Гран-присини қўлга киритди, деб ёзади UzDaily.

Танлов Корея Республикасининг Ўзбекистондаги элчихонаси томонидан ташкил этилди. Уни 950 дан ортиқ томошабин кузатиб борди.

Таъкидлаш жоизки, танловнинг 13 май куни бўлиб ўтган саралаш босқичида 200 ижрочидан иборат 91 та жамоа иштирок этди. Улардан 57 нафар ижрочидан иборат 12 та гуруҳ финалда иштирок этиш учун танлаб олинди.

Жюри қарори билан «Аёл президент» (Female President) қўшиғини ижро этган икки иштирокчи Хўжабоева Нигина ва Ёқубова Моҳларойимдан иборат Fomalhaut гуруҳи Гран-прини қўлга киритди.

Биринчи ўринни турли миллатдаги тўққиз нафар ижрочидан иборат «Алладин» гуруҳи эгаллади. Улар Кореянинг машҳур TINY-G гуруҳи ижросидаги «Миниманимо» қўшиғини ижро этди.

Қолган барча жамоалар дипломлар ва қимматбаҳо совғалар билан тақдирланди.