Япониянинг Тояма префектураси полицияси 3 июнь, шанба куни Тояма аэропортидан парвоз қилган Cessna-172 енгил самолётининг ҳалокатга учраши оқибатида тўрт кишининг қурбон бўлганлигини тасдиқлади. Бу ҳақда 4 июнь, якшанба куни NHK телеканали маълум қилди, деб ёзади «ТАСС».
Қутқарувчилар ҳалокат ҳудуди Япон Альпларининг шимолий қисмидаги баландлиги 2,3 минг метрга яқин тоғли қояларида бўлганлиги сабабли ҳалокатга учраган самолётни 4 июнь тонгида топишга муваффақ бўлди. Тоғларга туман тушганлиги туфайли 3 июнь, шанба кунги қидирув-қутқарув ишлари муваффақиятсиз якунланган.
Самолётнинг ҳалокатга учраганлиги ва жабрланувчиларнинг аҳволи ҳақида бортдагилардан бири полицияга хабар қилган. У икки киши ҳушсиз эканлигини маълум қилган. Бироқ полиция ва Мудофаа кучлари аскарлари қулаган самолётни вертолёт ёрдамида топганда унда ҳеч ким тирик қолмаганлиги маълум бўлди. Одамларнинг ўлимига нима сабаб бўлганлиги маълум қилинмади.
New Central Airservice компаниясига тегишли самолёт машқ парвозини амалга ошираётган ва Нагано префектураси Мацумото шаҳрига йўл олган эди.
Изоҳ (0)