Британия полицияси Лондондаги терактларда 6 киши ҳалок бўлганини маълум қилди

Лондонда 3 июнь, шанба куни юз берган терактларда олти киши ҳалок бўлди, деб ёзади «ТАСС» Скотленд-Ярд шефи ўринбосари Марк Роулига таяниб.

«Айни пайтгача, бизнинг маълумотларимизга кўра, олти киши ҳалок бўлган, бундан ташқари, полиция ҳужум қилган уч нафар шахсни отиб ташлади, — деди у. — 20 га яқин киши яраланади, уларнинг сони ортмоқда».

Унинг айтишича, ҳужумда уч террорчи иштирок этган.

Автомобиль Лондон-бридж кўприги ҳудудида пиёдалар устига бостириб боргани ҳақидаги маълумотлар 3 июнь, шанба куни 22:08 (Тошкент вақти билан 4 июнь, якшанба куни 02:08) да келиб туша  бошлаган. Сўнг автомобиль Лондон-бридждан Боро-маркет бозорига қараб йўлини давом эттирган. Гумонланувчилар автомобилдан тушиб, одамларни пичоқлашга уринган.

Лондон Тез ёрдам хизмати баёнотига кўра, терактлар натижасида жабрланганлар сони 30 кишига етди.