Ливан ва Сурия чегарасида ИШИД «Жабҳат ан-Нусра» марраларига ҳужум қилди

Ливан ва Сурия чегарасида ўзаро рақобатдаги террорчи гуруҳлар — ИШИД ва «Жабҳат ан-Нусра» террорчилари ўртасида тўқнашувлар юз берди. Бу ҳақда «ТАСС» хабар қилмоқда.

Айтилишича, тоғли туманлардан бирида, Ливаннинг Эрсал шаҳри яқинидаги Сахл Ажрам водийсида ИШИД «Жабҳат ан-Нусра» марраларига ҳужум қилган. Ҳужум худкушларнинг «Жабҳат ан-Нусра» марралари яқинида ўзини ҳавога учиришидан бошланган.

ИШИД террорчилари душман томоннинг қаршилигига дуч келиб, суриялик қочқинлар лагерлари жойлашган Хмайид водийсига ёриб ўтишга уринган, аммо у ерда Ливан армияси томонидан ўққа тутилган ва мақсадига эриша олмаган.

Ливан армияси ҳимоя қилаётган Рас-Баалбек шаҳри яқинида террорчиларга зарба берилган.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.