Хитой мамлакатдаги «қайноқ муз» захираларини нефть эквивалентида 80 млрд тоннага баҳолади

Хитой ер ва табиий захиралар вазирлиги табиий газ гидрати — «қайноқ муз» миллий захираларини нефть эквивалентида 80 миллиард тоннага баҳолади. Бу ҳақда Хитой Геология хизмати директори ўринбосари Ли Цзиньфа маълум қилди, дея хабар беради «Синьхуа» агентлиги.

Ли Цзиньфага кўра, ҳозирда Хитой суткада тахминан 8350 куб метр юқори тозалик даражасига эга газни қазиб олмоқда. «Қайноқ муз» макони Жанубий Хитой денгизида, Чжухай шаҳридан 320 километр жануби-шарқда жойлашган.

Хитой «қайноқ муз» конларини қидириш бўйича ишларни жадаллаштириши, уларнинг турли намуналарини олиш учун синов тариқасида бурғулашлар ўтказиши, шунингдек, мазкур йўналишда инновацион технологияларни ривожлантириши билдирилди.

Эслатиб ўтамиз, ўтган ойда хитойлик нефтчилар тарихда илк бор Жанубий Хитой денгизи тубидан «қайноқ муз» — юқори босим ва паст ҳарорат таъсирида кристалл моддага айланган сув ва табиий газ бирикмасини қазиб олгани ҳақида хабар берилганди.