Сурияда сўнгги олти ой ичида коалицияга ИШИД террорчилик ташкилоти тасарруфидаги таянч пункларидан разведка маълумотларини бераётган кўнгиллилар сони тобора ортмоқда. Бу ҳақда Financial Times нашри ахборот берувчилардан бирига асосланиб маълум қилди, деб хабар берди «РИА Новости».
«Ҳозирда барча коалицияга ишлашни хоҳламоқда. Нега? Одамлар чарчади. Баъзилар жуда қашшоқ аҳволда, баъзилар эса барчаси тугашини истамоқда. Биз билан ҳатто ИШИД жангарилари, жумладан, командирлар ҳам ишламоқда. Улар ИШИД енгилаётганини кўрмоқда ва ташкилот билан қурбон бўлишни исташмайди», — деди газета суҳбатдоши.
Манбанинг таъкидлашича, ҳамма ахборот берувчилар ҳам коалиция ҳаракатини маъқулламайди. Баъзилари берган маълумотлари сабаб тинч аҳоли орасида қурбонлар сони кам бўлишига умид қилмоқда, лекин асосий мақсад пул ишлаб олиш.
Маълумот бериш тизими бир неча босқичдан иборат. Жангарилар назорати остидаги ҳудудлар ҳақида маълумот берган сурияликлар ойига 100—300 доллар ишлаб топиши мумкин.
Шундан сўнг маълумотлар бир воситачидан иккинчисига ўтади ва Туркияда жойлашган гуруҳ бошлиғига етиб боради. Бу ахборотлар коалицияга аъзо давлат вакилларига берилади, шу билан бирга маълумотлар бир нечта давлатга сотилиши мумкин.
Чегаранинг ҳар икки тарафидаги воситачилар ойига 300 доллардан 2 минг долларгача ишлаб топмоқда. Гуруҳ координатори бу давр мобайнида маълумотни беш минг долларгача сотиши мумкин.
Маълумот тақдим қилингач, турли манбалар орқали унинг рост эканлиги текширилади. Сурияда ИШИД тарафида жанг қилаётган чет элликлар ва гуруҳ етакчилари ҳақидаги маълумотлар энг қадрли ҳисобланади. Жангарилар бошлиғи ёки унинг тан соқчиларини телефон рақамини топиш катта омад саналади.
Ахборот тарқатувчилар хабар алмашишда мессенжерлардан фойдаланади.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)