Suriyada so‘nggi olti oy ichida koalitsiyaga IShID terrorchilik tashkiloti tasarrufidagi tayanch punklaridan razvedka ma’lumotlarini berayotgan ko‘ngillilar soni tobora ortmoqda. Bu haqda Financial Times nashri axborot beruvchilardan biriga asoslanib ma’lum qildi, deb xabar berdi “RIA Novosti”.
“Hozirda barcha koalitsiyaga ishlashni xohlamoqda. Nega? Odamlar charchadi. Ba’zilar juda qashshoq ahvolda, ba’zilar esa barchasi tugashini istamoqda. Biz bilan hatto IShID jangarilari, jumladan, komandirlar ham ishlamoqda. Ular IShID yengilayotganini ko‘rmoqda va tashkilot bilan qurbon bo‘lishni istashmaydi”, — dedi gazeta suhbatdoshi.
Manbaning ta’kidlashicha, hamma axborot beruvchilar ham koalitsiya harakatini ma’qullamaydi. Ba’zilari bergan ma’lumotlari sabab tinch aholi orasida qurbonlar soni kam bo‘lishiga umid qilmoqda, lekin asosiy maqsad pul ishlab olish.
Ma’lumot berish tizimi bir necha bosqichdan iborat. Jangarilar nazorati ostidagi hududlar haqida ma’lumot bergan suriyaliklar oyiga 100—300 dollar ishlab topishi mumkin.
Shundan so‘ng ma’lumotlar bir vositachidan ikkinchisiga o‘tadi va Turkiyada joylashgan guruh boshlig‘iga yetib boradi. Bu axborotlar koalitsiyaga a’zo davlat vakillariga beriladi, shu bilan birga ma’lumotlar bir nechta davlatga sotilishi mumkin.
Chegaraning har ikki tarafidagi vositachilar oyiga 300 dollardan 2 ming dollargacha ishlab topmoqda. Guruh koordinatori bu davr mobaynida ma’lumotni besh ming dollargacha sotishi mumkin.
Ma’lumot taqdim qilingach, turli manbalar orqali uning rost ekanligi tekshiriladi. Suriyada IShID tarafida jang qilayotgan chet elliklar va guruh yetakchilari haqidagi ma’lumotlar eng qadrli hisoblanadi. Jangarilar boshlig‘i yoki uning tan soqchilarini telefon raqamini topish katta omad sanaladi.
Axborot tarqatuvchilar xabar almashishda messenjerlardan foydalanadi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)