Россия мудофаа вазирлиги Ту-154 самолётининг Қора денгиз осмонидаги ҳалокатининг текшируви якунларини эълон қилди ва ҳалокатга экипаж командирининг самолётни бошқариш чоғидаги хато ҳаракатлари сабаб бўлган бўлиши мумкинлигини маълум қилди, деб ёзади «Газета.ru».
«Текширув натижаларига кўра аниқландики, ҳодисага ҳаво кемаси командирининг маконда мўлжал ололмаслиги натижасида ҳаво кемасини бошқариш органларидан хатолик билан фойдаланиши сабабчи бўлган бўлиши мумкин», — дейилади хабарда.
Шунингдек, хабарларга кўра, самолёт ҳалокатини текшириш бўйича комиссия ёқилғи қуйиш қоидалари бузилганини аниқламаган.
Эслатиб ўтамиз, 2016 йил 25 декабрь куни Сочи шаҳридан кўтарилган Ту-154 самолёти ҳавога кўтарилганидан 70 сония ўтиб Қора денгизга қулаган эди. Авиаҳалокат оқибатида самолёт бортида бўлган 92 кишининг барчаси ҳалок бўлган.
Йўловчиларнинг аксарияти Россия армиясининг Александров номидаги ашула ва рақс ансамбли аъзолари эди. Улар россиялик ҳарбийларга Янги йил концерти тақдим этиш учун Сурияга учиб кетаётган эди.
Изоҳ (0)