АҚШ президентининг қизи Иванка Трамп фирмаси пойабзалларини чиқарадиган Хитойдаги фабрика шароитларини махфий ўрганаётган China Labor Watch ҳуқуқни ҳимоя қилиш ташкилоти фаоли қўлга олинди. Унинг икки сафдоши бедарак йўқолди. Бу ҳақда Time манбаларига таяниб, «ТАСС» хабар берди.
Журнал 17 йилдан бери фаоолият кўрсатадиган ва дунёдаги йирик компаниялар етказиб берувчиларида меҳнат қонунчилигига риоя этилишини ўрганадиган China Labor Watch (Нью-Йорк, АҚШ) маълумотларини келтирган.
Ташкилот ўтган дам олиш кунлари ўзининг Хитойдаги ходимлари — Хуа Хайфен, Ли Чжао ва Су Хен билан боғлана олмади. Хуа Хайфеннинг турмуш ўртоғига полициядан 30 май, сешанба куни қўнғироқ қилиб, у эри билан кўришиш, гаплашиш ва пул олишдан маҳрум этилганини маълум қилишган.
«Дам олиш кунлари уч нафар фаолимизга ўнлаб маротаба қўнғироқ қилишга уриндим, бироқ бундан натижа чиқмади. Уларни боғланиб бўлмаслик учун фабрика ёки полицияда тутиб турилганини тахмин қилдик», — дея таъкидлади China Labor Watch директори Ли Дзян.
Маълумот учун, Иванка Трампнинг фирмаси Хитой ҳудудида 16 савдо белгисини рўйхатдан ўтказган. Яна 4 та белги Дональд Трампнинг инаугурация маросимидан сўнг тасдиқланди.
Изоҳ (0)