Тошкентдаги «Пойтахт» бизнес марказида 31 май куни Ўзбекистон—Германия бизнес-форуми ва кооперация биржаси бўлиб ўтди. Бу ҳақда ЎзА хабар бермоқда.
Ўзбекистон Савдо-саноат палатаси томонидан ташкил қилинган ушбу тадбирда икки мамлакатнинг қишлоқ хўжалиги соҳасига масъул вазирлик ва идоралари, агросаноат учун техника ва технологиялар ишлаб чиқаришга ихтисослашган фирма ва компаниялари вакиллари иштирок этди.
Германиялик ишбилармонларга 2017—2021 йилларда Ўзбекистонни ривожлантиришнинг бешта устувор йўналиши бўйича Ҳаракатлар стратегияси, Ўзбекистон ижтимоий-иқтисодий ҳаётида амалга оширилаётган кенг кўламли ислоҳотлар ҳақида маълумот берилди.
Икки мамлакат ўртасида савдо-иқтисодий ҳамкорликни янада ривожлантириш, қишлоқ хўжалиги маҳсулотларини етиштириш, чуқур қайта ишлаш, сақлаш, қадоқлаш ва экспорт қилиш бўйича мажмуалар қуриш, замонавий қўшма корхоналар ташкил этиш, соҳага ноу-хауларни кенг жорий этишга оид масалалар муҳокама қилинди.
«Мазкур тадбир Ўзбекистонда сармоядорлар учун яратилган имкониятлар билан танишиш, иштирокчиларни Германияда ишлаб чиқарилаётган қишлоқ хўжалиги техника ва технологиялари билан таништириш, фикр ва тажриба алмашиш имконини берди. Мамлакатингиз ишбилармонлари билан ўзаро ҳамкорликни ривожлантиришдан манфаатдормиз», – деди Германия Озиқ-овқат ва қишлоқ хўжалиги федерал вазирлигининг савдо департаменти раҳбари Аксел Липински.
ЎзАнинг қайд этишича, Германия Ўзбекистоннинг Европадаги муҳим савдо-иқтисодий ҳамкорларидан бири саналади. Ўзбекистонда MAN, Claas, Lemken, Knauf каби дунёга машҳур немис компаниялари иш юритмоқда. Икки мамлакат ўртасидаги ўзаро товар айирбошлаш ҳажми 2016 йили 520 миллион доллардан ошди.
Ўзбекистонда Германия сармояси иштирокида 110 дан зиёд корхона фаолият кўрсатмоқда. Ўзбекистондан Германияга мева-сабзавот маҳсулотлари, пахта толаси ва матолар, ноорганик кимё маҳсулотлари, мис буюмлар экспорт қилинади, транспорт ва сайёҳлик хизматлари кўрсатилади.
Изоҳ (0)