Агар сиз эътибор берган бўлсангиз, гўзаллик салонидаги сартарошлар сочларни кесиш ёки турмаклашдан олдин сон-саноқсиз тароқлар ичидан керагини танлаб олади. Уларнинг ҳар бири белгиланган мақсадлар учун мўлжалланган. Қайси бири сизга тўғри келади? Тароқларни билиб олишни ўрганамиз.
Узун ва қалин сочларни турмаклаш учун
Ясси ва кенг тароқ — узун ва қалин сочларни турмаклаш учун жуда мос. Қоидага мувофиқ, бундай чўткаларнинг қили пластик ва юмалоқ бурчакли бўлади. Елкадан узунроқ тушиб турган сочлар бундай чўтка ёрдамида тезроқ қурийди, фен ёрдамида қуритишда унинг қиллари қўшимча ҳажм беради.
Жингалак сочларни текислаш учун
Ўзига хос чўзинчоқ тешиклари бўлган, ясси ва кенг бу чўтка сочларни турмаклаш вақтини анча камайтиради. Чунки унинг қиллари ва шакли ҳаво сочларнинг бутун узунлиги бўйлаб ва ҳамма томондан етиб боришига имкон беради. Бундай чўткаларни ўртача узунликдаги ва дағал сочларни турмаклашда, шунингдек жингалак сочларни тўғрилашда ишлатиш жуда қулай.
Калта сочларни парвариш қилиш учун
Агар сизнинг сочларингиз калта қилиб кесилган бўлса, кичкина думалоқ чўтка — сизнинг энг яхши дўстингиз. У боб усулда турмакланган сочларни тўғрилаш ва учларини сал букиш учун мос келади. Бу чўтка ёрдамида узун сочларни жингалак қилиш, уларни чўткага ўраб фен билан иссиқлик бериш мумкин. Агар сочларингиз иягингиздан сал калтароқ бўлса 4 см ёки ундан кичикроқ чўткаларни, агар улар ўртача узунликда бўлса диаметри 3 см дан 7 см гача бўлган чўткаларни танланг.
Ҳашаматли жингалаклар учун
Кичкина думалоқ чўткалар сингари катта чўткалар каттароқ жингалаклар қилиш учун мос келади. У ўртача ва узун сочларни тўғрилаш ёки ҳажм бериш учун ҳам жуда мос келади. Агар сочларингиз узунлиги ўмров суяги чизиғидан пастда бўлса диаметри 7 дан 12 см гача бўлган чўткаларни танланг, чунки улар сочларингиз қанчалик қалин бўлмасин керакли ҳажмни бера олади.
Сочларга жило бериш учун
Силлиқловчи чўтка сочларни тўғри, ипакдек майин, текис қилишга имконият беради ва сочларнинг умумий аҳволини яхшилайди. Бундай чўтка бош териси табиий ёғларини сочларнинг бутун узунлиги бўйлаб бир текисда тарқалишига ёрдам беради. Одатда қиллари дағал бўладиган бундай чўткалар ўртача ва узун сочларга жуда мос келади.
Чигал сочларни тараш учун
Сиз сочларга зарар бермаслик учун ҳўллигида тарамаслик кераклиги тўғрисида сартарошлардан кўп эшитган бўлсангиз керак. Лекин бу қоида ушбу чўткага тааллуқли эмас: ўзининг юмшоқ қиллари туфайли бу чўтка сочларга зарар етказмайди, уларнинг эгилувчанлиги эса сочлар ҳўл бўлса ҳам суғурилишига йўл қўймайди.
Сочларга илдизидан ҳажм бериш учун
Агар сиз сочларга илдизидан ҳажм берилишини талаб қилувчи соч турмагини танлаган бўлсангиз, бу чўтканинг таранг қиллари бу вазифани жуда яхши бажаради. Лекин, эҳтиёт бўлинг бу чўткадан меъёридан ортиқча фойдалансангиз у сочларингизга зарар етказиши мумкин.
Фото: «Woman.ru»
Изоҳ (0)