Дунёдаги ўлим ҳолатларининг учдан бир қисми сабаби аниқланди

Шифокорлар халқаро гуруҳи дунёдаги ўлимларнинг тахминан учдан бир қисми юрак-томир касалликлари туфайли юз беришини аниқлади, деб ёзади Америка кардиология коллежи.

Юрак-томир касалликларидан энг кўп ўлим қайд этилган мамлакатлар қаторига Шарқий Европа, Марказий Осиё, Яқин Шарқ, Жанубий Америка, Қора Африка ва Океания давлатлари киради. Япония, Андорра, Перу, Франция, Исроил ва Испанияда ушбу кўрсаткич энг пастдир.

Тадқиқотчилар аниқлашича, сўнгги беш йил ичида АҚШ, Канада, Австралия, Янги Зеландия, Япония, Жанубий Корея ва Шарқий Европа мамлакатларида юрак-томир касалликларидан вафот этиш ҳолатлари камайиши секинлашган.

Мутахассислар олимлар ва сиёсатчиларни юрак-томир касалликларига қарши курашишга чақирмоқда, улар юзага келиши хавфининг асосий омиллари юқори қон босими, ёмон овқатланиш, холестериннинг юқори даражаси, тамаки чекиш, алкоголь қабул қилиш ва семизлик ҳисобланади.