17 май куни Тошкентда Global Oil and Gas Uzbekistan Халқаро кўргазмаси маданият дастури доирасида «Қуёшнинг 365 куни» китобининг тақдимоти бўлиб ўтди.
Ушбу нашр Dinara&Co нашриёт уйининг Welcome to Uzbekistan деб номланган тўпламидаги биринчи китоб саналади. Лойиҳадан кўзланган мақсад – Ўзбекистоннинг туризм соҳасидаги салоҳиятини намоён этиш ва жаҳон ҳамжамияти эътиборига миллий таомларга янгича нигоҳни тақдим этишдан иборат.
Китоб муаллифи Баҳриддин Чустий томонидан «Тандир ичидан мўъжиза» деб номланган ошпазлик шоуси тақдимотнинг марказий қисмидан жой олди. Ошпазлар «Ўзбекнефтгаз» Миллий холдинг компаниясининг 25 йиллиги муносабати билан рамзий маънода тандирда 25 хил таом билан меҳмонларни сийлашди.
«Қуёшнинг 365 куни» – Ўзбекистон бўйлаб саёҳат ҳақидаги биринчи ва бугунги кунда ягона люкс-китоб ҳисобланиб, 50 дан ортиқ таом, 200 та фотосурат, 3000 дан зиёд фотолавҳа ва миллионлаб мазали ширинликларни ўз ичига олади. Муаллифлар 6 ой давомида саёҳатда бўлиб қадимий ва кўпчиликка маълум бўлмаган таомлар, уларни тайёрлаган миллий ошхона қаҳрамонларини топди ҳамда таомлар фотосуратларидан ҳайратланарли дурдоналар яратди.
Нашр рус ва инглиз тилларида тақдим этилган, ўзбек тилидаги нашр чоп этишга тайёр. Айни вақтда дунёнинг бошқа тилларига ҳам таржима қилиниши режалаштирилган.
Изоҳ (0)