Сураткашдан қўл сўраш жараёнини ҳеч кимга билдирмай расмга олишни сўрашди. У эса 6 соат бошқа бир жуфтликни суратга олди

Май ойининг бошларида америкалик йигит Жейкоб Питерс исмли сураткашнинг хизматидан фойдаланиш учун унга мурожаат қилди, деб хабар бермоқда Meduza.

Йигит Питерсга Миллий Озарк қўриқхонасида бир қизнинг қўлини сўрашни режалаштираётганини ва буни суратга олиш кераклигини айтди. Питерс ва йигит фотосессия эрталаб соат 6:00 да бошланишига келишиб олди.

Питерс қўриқхонага соат 4:45 да етиб келди. У 13 килограммлик жиҳоз билан қарийб бир соат мобайнида тоғда айланиб юрди.

Келишилган жойга етиб келганида у ерда бир ёш жуфтликни кўрди ва уларни расмга ола бошлади. Бир неча дақиқадан сўнг йигит узук олиб, қизнинг қўлини сўради. Қиз йиғлаб юбориб, уни қучоқлаб олди. «У рози бўлгани кўриниб турарди», — деди сураткаш.

Питерс яна бир неча соат жуфтликни расмга олиб, уйига қайтди. Мижозга уни табриклаб, ҳаммаси кўнгилдагидек ўтгани, расмлар яхши чиққанини ёзиб юборди ва ухлашга ётди.

Питерс уйғонганида мижоз ёзган жавобни кўрди: «Тушунмаяпман, биз бироз кеч қолдик ва Сизни кўрмадик. Бизни суратга олганингизга ишончингиз комилми? Мен катакли кўк кўйлакда эдим».

Шундан сўнг рассом хато қилганини тушунди. Питерснинг сўзларига кўра, у қўриқхонагача бўлган йўл ва суратга олиш жараёнига жами 6,5 соат сарфлаган. 450 та расм олган — бироқ буларнинг барчаси бошқа жуфтликники.

Питерс суратга олган жуфтликни қидириб топиб, уларга расмларни жўнатишга қарор қилди ва ушбу воқеани Facebook’да эълон қилди. Кўп ўтмай, жуфтлик топилди.

Питерс мижозларига бепул фотосессия ташкиллаштиришга ваъда берди.