Шайх Муҳаммад Содиқ Муҳаммад Юсуф асос солган «Ҳилол-нашр» матбаа-нашриётида Тошкент шаҳридаги Ислом ота жомеъ масжидининг имом-ноиби Ҳасанхон Яҳё Абдулмажиднинг «Хатми Қуръонга марҳабо!» китоби ҳамда «Қуръон тартили» сабоқларининг тақдимоти бўлиб ўтди. Бу ҳақда «Muslim.uz» хабар бермоқда.
Маросимда Ўзбекистон мусулмонлар идорасининг раиси, муфтий Усмонхон Алимов иштирок этди ва Рамазони шариф арафасидаги тақдимот билан нашриёт жамоаси ҳамда йиғилганларни қутлади. Бугунги кунда диний соҳада юз бераётган янгиликларга тўхталди.
— Имом Бухорий номидаги Тошкент Ислом институтининг «Таҳфизул-Қуръон» бўлимида қорилар етишиб чиқмоқда ва масжидларда ташкил қилинаётган хатми Қуръонларда фаол иштирок этмоқда, — дея таъкидлади муфтий ҳазратлари. — Бундай қориларни етиштирадиган даргоҳларга яна эҳтиёжимиз, яхши ниятларимиз, режаларимиз бор. Жумладан, Президент раҳбарлигида Бухордаги «Мир Араб» мадрасасини «Олий мадраса» қилиш лойиҳаси ишланяпти. Унда ҳам Маъҳаддаги каби «Таҳфизул Қуръон» кафедраси бўлиши режалаштирилган.
«Ҳилол-нашр» матбаа-нашриёти раҳбари Исмоилжон Муҳаммад Юсуф йиғилганларга яна бир хушхабар етказди. Унга кўра, шайх Муҳаммад Содиқ Муҳаммад Юсуф ҳазратларининг барча асарлари Мадинаи Мунаввара ва Маккаи Мукаррама кутубхоналарига қўйиладиган бўлди. Бундан буён дунёнинг турли чеккаларидан ҳаж ва умра сафари ниятида икки ҳарамга борган ҳожиларимиз шайхнинг китобларини ўз она тилларида ўқиб, баҳраманд бўлишлари мумкин. Куни кеча китобларнинг биринчи қисми Саудия Арабистонига жўнатилди.
Изоҳ (0)