Швейцарияда қуёш батареясида ишловчи биринчи самолёт синовдан ўтказилди

Швейцариянинг SolarStratos компанияси қуёш батареясида ҳавога кўтарилган биринчи самолёт прототипини синовдан ўтказди. Бу ҳақда, The Engineer нашрига асосланиб, «Коммерсант.ru» хабар бермоқда.

Компания ходимлари томонидан ишлаб чиқилган Elektra-2 самолётининг биринчи парвози 300 метр баландликда 7 дақиқа давом этди.

Ушбу самолёт стратосферадаги парвозлар учун махсус ишлаб чиқилган эди.

«Замонавий технологиялар ёрдамида қазиб олинувчи ёқилғидан фойдаланишдан воз кечиш мумкин. 25 километр баландликкача кўтарила оладиган самолётимиз қуёш ва электр авиацияси дунёсига ойна очади», — деди синовчи учувчи Рафаэль Домиан.