Ўзбекистон Президенти 21 апрель куни «2017—2021 йилларда маиший чиқиндилар билан боғлиқ ишларни амалга ошириш тизимини тубдан такомиллаштириш ва ривожлантириш чора-тадбирлари тўғрисида»ги қарорни имзолади.
Қарор чиқиндилар билан боғлиқ ишларни амалга ошириш тизимини тубдан такомиллаштириш ва ривожлантириш, муносиб яшаш шароитларини яратиш, республикада санитария ва экологик вазиятни яхшилашга йўналтирилган.
Қарорнинг расмий шарҳида қайд этилишича, ҳозирги вақтда мамлакатдаги чиқиндилар тўпланадиган мавжуд полигонлар санитария қоидалари, нормалари ва гигиена меъёрларига тўлиқ жавоб бермайди. Аксарият жойларда чиқиндилар тартибсиз равишда тўпланадиган пунктлар ҳамон сақланиб қолмоқда ва улар туташ ҳудудларнинг санитария-эпидемиология ҳолатини ёмонлаштириб, юқумли касалликлар пайдо бўлиши ҳамда тарқалишига шароит яратмоқда.
Қарорга мувофиқ, 2017 йилда Ўзбекистон шаҳарларидаги санитария жиҳатидан тозалашга ихтисослаштирилган ташкилотлар ва туман ободонлаштириш бошқармаларига 237 та махсус техника харид қилиш, 94 та гараж қуриш, қаттиқ маиший чиқиндилар учун 168 та элак қурилмалари ўрнатиш кўзда тутилган. Қаттиқ маиший чиқиндилар тўпланадиган 168 та полигонни ободонлаштириш режалаштирилган.
Тошкент, Самарқанд, Андижон ва Наманган шаҳарларида йирик лойиҳаларни амалга оширишни ўз ичига олган, 2017—2021 йилларда халқаро молия ташкилотларининг 161 миллион АҚШ долларидан ортиқ маблағларини жалб этган ҳолда шаҳарларда чиқиндиларни тўплаш, ташиб кетиш, утилизация қилиш ва қайта ишлаш тизимини ривожлантиришга қаратилган инвестиция лойиҳалари рўйхати тасдиқланган.
Қаттиқ маиший чиқиндиларни қайта ишлайдиган технологияларни жорий этиш, жумладан, келгуси икки йилда Нукус шаҳри ва барча вилоятлар марказларида чиқиндиларни қайта ишлаш корхоналарини қуриш кўзда тутилган бўлиб, мазкур лойиҳаларга 27 миллион АҚШ долларидан зиёд маблағ йўналтирилади.
Бу борадаги ишларни мувофиқлаштириш ва мазкур дастурлар амалга оширилишини назорат қилиш, муаммоли масалаларни ҳал этиш бўйича тезкор чора-тадбирлар кўриш мақсадида Республика комиссияси ташкил этилган.
Умуман олганда, 2017—2021 йилларга мўлжалланган дастурни молиялаштириш учун 1 триллион сўмдан зиёд маблағ йўналтирилади.
Тошкент шаҳрида қаттиқ маиший чиқиндиларни ташиб кетиш ва чиқинди тўпланадиган пунктлар ва полигонлардан фойдаланиш «Махсустранс» ДУК ваколатида қолади, ҳудудларда эса — Қорақалпоғистон Республикаси Экология ва табиатни муҳофаза қилиш қўмитаси, шунингдек, вилоятлар Экология ва табиатни муҳофаза қилиш бошқармалари қошида ташкил этиладиган «Тоза ҳудуд» корхоналари томонидан амалга оширилади.
Қарорда кўзда тутилган лойиҳаларнинг амалга оширилиши натижасида аҳолини қаттиқ маиший чиқиндиларни ташиб кетиш хизматлари билан қамраб олиш даражаси 2021 йилгача Ўзбекистон бўйича 63 фоиздан 93 фоизга ўсиши кутилмоқда.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)