Безорилик ҳамда полицияга ҳужум қилгани учун чихуахуа ҳибсга олинди

Шимолий Ирландиянинг Крейгавон шаҳри полицияси чихуахуани ҳибсга олишга мажбур бўлди, деб хабар қилди Meduza.

Кучук 19 апрель эрталабки соат 03:00 да кўчалар назорати пайти — у кўчани кесиб ўтаётганида топилган. Полиция ходимлари кучукка Найжел лақабини берди.

«У рухсат этилмаган жойдан йўлни кесиб ўтгани, безорилиги ва икки марта полициячига ҳужум қилгани учун ҳибсга олинди», — дея ҳазиллашди полиция ходимлари.

Полициядагилар Facebook’да қолдирилган пост орқали чихуахуанинг эгасини топишга умид боғлаган.

Уларнинг сўзларига кўра, Найжел «кичкина жаҳлдор» ва «полицияга нисбатан жуда жиддий кайфиятда» бўлган. «Менга ўзимнинг бармоқларим жуда ёқади, аммо кучук яна бир кеча қоладиган бўлса, бармоқсиз қолишим тайин», — деб ёзди ходимлардан бири.

19 апрель куни кечаси полициячилар кучукнинг эгасини топишга муваффақ бўлди. Итнинг лақаби — Симба бўлиб чиқди. «У, шубҳасиз, ўзини шер деб ўйлайди», — дея таъкидлади полициядагилар.

«Дарё»нинг Telegram’даги расмий канали — @toshqindaryo’га аъзо бўлинг!