Ўзбекистон ҳукумати 2017—2020 йилларда республика ҳудудларида ишсиз фуқароларни касб-ҳунарга ўқитиш марказларини босқичма-босқич ташкил этиш бўйича қарор қабул қилди. Бу ҳақда Norma хабар бермоқда.
Мазкур марказлар давлат таълим муассасалари ҳисобланади ва бевосита Меҳнат вазирлигига бўйсунади. Уларнинг фаолиятига умумий ўқув-услубий раҳбарлик қилиш Олий ва ўрта махсус таълим вазирлигининг Ўрта махсус касб-ҳунар таълими марказига юкланади.
Марказлар қуйидаги мақсадларда ташкил этилмоқда:
- Ўрта махсус касб-ҳунар маълумотига эга бўлган ишсиз ва вақтинча банд бўлмаган, шу жумладан, доимий ишга эга бўлмаган шахсларни меҳнат бозорида талаб юқори бўлган мутахассислик ва касблар бўйича 1 йилгача бўлган муддатда касб-ҳунарга бепул қайта тайёрлаш ва малакасини ошириш;
- Меҳнат органларида ишсиз сифатида рўйхатдан ўтмаган, иш излаётган шахсларни, шунингдек, иш берувчиларнинг буюртманомалари бўйича ходимларни, ҳар йили ўқишга олинадиганлар сонининг 15 фоизидан ортиқ бўлмаган ҳажмда, меҳнат бозорида талаб юқори бўлган мутахассисликлар ва касб-ҳунарлар бўйича тўлов асосида қисқа муддатли ўқитишни ташкил этиш.
Белгиланган тартибда ишсиз деб эътироф этилган шахслар жумласидан бўлган ўқувчиларга ташкил этилаётган марказларда бевосита бепул ўқиётган даврида Бандликка кўмаклашиш жамғармаси маблағлари ҳисобидан, қонун ҳужжатларида белгиланган энг кам иш ҳақининг 1 баробари миқдорида, 6 ойдан кўп бўлмаган муддат мобайнида стипендия тўланади.
Ҳужжат билан марказларни моддий-техник ривожлантириш ва ходимларини моддий рағбатлантириш жамғармаси ташкил этилди. У марказларнинг пулли, қисқа муддатли курслар ташкил этиш фаолиятидан ва қонун ҳужжатларида тақиқланмаган бошқа манбалардан тушадиган маблағлар ҳисобига шакллантирилади. «Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)