Жиззах вилояти ИИБ Ёнғин хавфсизлиги бошқармаси томонидан ўтказилган навбатдаги Жиноятчиликнинг олдини олиш ва профилактика куни самарали ўтди. Бу ҳақда Жиззах вилояти ИИБ ЁХБ катта муҳандиси, лейтенант Фаррух Абдураҳмонов «Дарё»га маълум қилди.
Шу куни вилоят ИИБ ЁХБ раҳбарияти ва ходимлари томонидан маҳаллий давлат ҳокимияти органлари, фуқароларнинг ўзини-ўзи бошқариш органлари, профилактика инспекторлари ва бошқа мутасадди ташкилотлар билан ҳамкорликда вилоятнинг Бахмал, Ғаллаорол, Мирзачўл, Арнасой каби туманларида профилактик тадбирлар олиб борилди. Жумладан, Бахмал тумани маиший хизмат кўрсатиш касб-ҳунар коллежи ва 1-сонли умумий ўрта таълим мактабида ҳам ўқувчи-ёшлар ва ота-оналар билан учрашув ўтказилди.
«Жорий йилнинг шу кунига қадар ходимларимиз томонидан ёнғин хавфсизлигини таъминлаш мақсадида тарғибот-ташвиқот ишларига алоҳида эътибор берилди. Ўтган уч ой давомида корхона-ташкилотларда 283 маротаба 25 753 нафар ишчи хизматчи билан, ўқув муассасаларида, маҳаллаларда 388 маротаба 24 832 нафар фуқаро ҳамда аҳоли турар жойларида 38 402 маротаба 102 771 нафар фуқаро билан суҳбатлар ўтказдик. Ўтказилган тарғибот-ташвиқот ишлари ўз самарасини бериб, вилоятимиз ҳудудида содир бўлган ёнғинлар ўтган йилнинг шу даврига нисбатан 3,6 фоизга камайишига эришилди. Афсуски, ёнғинлар натижасида инсонларнинг тан жароҳати олиш ва ҳалок бўлиш ҳолатлари ҳам қайд этилмоқда. Таҳлиллар ёнғинларнинг асосий қисми яшаш уйларида содир бўлаётганлиги, бунга иситиш печлари, электр ускуналари, оловдан эҳтиётсизлик ва болалар шўхлиги асосий сабаблар бўлиб қолаётганлигини кўрсатмоқда», — дейди сержант Анвар Қиличев
Ҳудудий профилактика инспектори майор Алишер Казаков ҳам сўзга чиқиб, вояга етмаган ёшлар ўртасида учраётган турли ҳуқуқбузарликлар ва уларнинг илдизларига эътибор қаратди. Улардан бир нечтаси ўқувчи-ёшлар эътиборига ҳавола этилди. Дарсларга ўз вақтида қатнашмаслик, бекорчилик, бирор касбнинг бошини тутмаслик, виртуал ўйинларга муккасидан кетиш каби ҳолатлар ҳуқуқбузарликлар илдизлари дея эътироф этилди. «Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)