Жиноят ишлари бўйича Самарқанд туман суди вакиллари томонидан ҳар куни туманнинг икки маҳалласида давра суҳбатлари ўтказилиши белгилаб олинди. Бу ҳақда «Дарё»га суд мутасаддилари маълум қилди.
Давра суҳбатлари давомида туман суди раисининг сайёр қабуллари ҳам ташкил қилиниб, фуқароларнинг муаммолари жойида ҳал қилинмоқда. Шу билан бирга, жиноят ва маъмурий ҳуқуқбузарлик тўғрисидаги ишларни сайёр суд мажлисларида муҳокама қилиш амалиёти ташкил қилинди.
Жумладан, «Хўжа Аҳрор Вали-1» маҳалласида ўтказилган давра суҳбатида жорий йил биринчи чорагида туманда қасддан баданга енгил шикаст етказиш, вояга етмаган ёки меҳнатга лаёқатсиз шахсларни моддий таъминлашдан бўйин товлаш, ўзлаштириш ёки растрата йўли билан талон-торож қилиш, фирибгарлик ва ўғрилик билан боғлиқ жиноят ишлари судда кўрилиши купайганлигини билдирилди.
Б. исмли шахсга оид жиноят иши сайёр суд мажлисида муҳокама қилинди. У маҳалла ҳудудида жойлашган туман марказий шифохонаси ёнида таниши С. Ҳотамова (исм-шариф ўзгартирилган) билан жанжаллашиб, унинг фуқаролик паспортини тортиб олади ва йиртиб ташлайди.
Суд мазкур жиноят иши бўйича билдирилган фикрларни инобатга олиб, Б.ни айбли деб топди. Унга 1 йил муддатга озодликдан маҳрум қилиш жазосини тайинланди ва сайёр суд залидан қамоққа олинди.
Қайд этиш жоизки, жиноят ишлари бўйича Самарқанд туман суди томонидан режага асосан ўтказилаётган тадбирлар, суд-ҳуқуқ соҳасида янгиликлар билан туман судининг Facebook’даги саҳифаси орқали танишиб бориш имконияти яратилган.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)