Ўсиб бораётган рақобат ва глобаллашув шароитида кўплаб мамлакатлар кичик бизнес ва хусусий тадбиркорликни молиялаштиришга кенг эътибор қаратмоқда. Профессионал бизнес-ассоциацияларнинг тадбиркорликни ривожлантиришдаги роли ҳақида Халқаро бизнес ва технологиялар Ассоциацияси директори Шуҳрат Азимов сўзлайди.
– Ассоциациянинг пайдо бўлиш тарихи ҳақида сўзлаб берсангиз.
– 2013 йилда ТИФ соҳасида кўп йиллик тажрибага эга бир нечта тижорий компаниялар ўз фаолият доирасини кенгайтириш ҳамда бизнес-имкониятлар ва ғояларни излаб топиши, Ўзбекистон ва чет эл тадбиркорлари ўртасида «кўприк» вазифасини ўташи лозим бўлган жамоатчилик ташкилотини тузишга қарор қилди.
Яхши тушуниб етган эдикки, бизда бизнес соҳасидаги қизиқишларни ўртага ташловчи ижтимоий майдонча қарийб йўқ эди ва бу камчиликни тезликда тузатишга қарор қилдик. Шу тарзда Халқаро бизнес ва технологиялар Ассоциясияси (AMBiT)пайдо бўлди.
– Ассоциациянинг асосий йўналишлари нималардан иборат?
Ҳозирги кунда энг асосий йўналиш –тадбиркорлик алоқаларини кенг ёйишдан иборат, яъни AMBiT тадбиркорларни ўзаро таништирувчи, таклиф ва ғоялар алмашинувини таъминловчи фасилитатор вазифасини ўтайди. Биз чет эл ташкилотлари билан музокаралар ўтказиш, дунё бўйлаб энг яхши таклифларни излаш ва уларни тадбиркорларга тақдим қилиш билан шуғулланамиз. Масалан, ишлаб чиқаришни техник қайта жиҳозлашда кўмаклашамиз.
Аслида, аъзолари бир-бири билан ўзаро манфаатли ҳамкорлик қилувчи фаол бизнес-ҳамжамият яратиш истагидамиз.
Яна бир йўналишимиз – чет эл мамлакатларига информацион бизнес турларни ташкил қилиш. Бундай сафарлар чет эл компаниялари билан алоқалар ўрнатиш, технологиялари, бозорлари билан танишиш учун жуда муҳим. Шу вақтга қадар тадбиркорларимизни Қозоғистон, Ҳиндистон, Нидерландия, АҚШ, Буюк Британия, Хитой, Гонконг, Сингапур каби давлатларга юбордик.
Ва албатта, таълим, аниқроғи раҳбар ходимлари ва ишчиларнинг потенциалини ошириш.
Барча таклифларимиз аъзоликнинг 5 тури доирасида амалга оширилиб, уларнинг ҳар бири тадбиркорларнинг муайян талаблари ва улар учун фойдали жиҳатларга мутаносиб келади.
– Бизнес турларнинг тадбиркорлар мустақил равишда амалга оширишлари мумкин бўлган хизмат сафарларидан фарқи нимада?
– Барчаси қилинаётган сафар мақсадига боғлиқ. Агар шартнома шартлари муҳокамаси учун ўз ҳамкорлари билан учрашиш керак бўлса, у ҳолда мустақил борган афзал. Бироқ бу имкониятларни кўздан кечириш учун танишув сафари бўлса, мутахассислар кўмагида гуруҳ таркибида борган маъқул.
Бизнес тур учун аввалдан махсус дастур, логистика, учрашувлар учун чет эл компаниялари ва уларнинг вакиллари рўйхати ишлаб чиқилади. Бундан ташқари, биз имтиёз асосида, яъни чет эллик шериклар билан ҳамкорлик доирасида харажатларнинг бир қисмини қопловчи турлар уюштиришга ҳаракат қиламиз.
Яқиндагина уюштирган турларимиздан бирида тўқимачилик саноати вакиллари Хитой сафарида бўлди. Бир ҳафта мобайнида 18 нафар тадбиркор ишлаб чиқариш бўйича тўқимачилик заводлари ва фабрикаларига, ритейл дўконларига ташриф буюрди, амалий учрашувлар ўтказди.
Натижада Хитой компаниялари билан бир нечта ҳамкорлик (импорт ва экспорт) шартномалари имзоланди, шунингдек, сафар иштирокчилари ўртасида ҳам ҳамкорлик йўлга қўйилди.
– Тадбиркорларга қандай амалий ёрдам кўрсатасизлар?
– Олиб бораётган фаолиятимиз аниқ натижалар бераётганига ўзимиз гувоҳ бўлмоқдамиз: компания хизматлари ва маҳсулотларининг кўпайганидан кейин пайдо бўлган янги мижозлар; ускуналарни етказиб бериш ҳақидаги ечимлар; биз уюштирган тадбирлар, b2b-учрашувлар, сафарлар давомида танишган тадбиркорлар ҳамкорлиги; ходимларнинг ишига ижобий таъсир кўрсатган малака оширишлар. Масалан, чет эл кўргазмаларига уюштирилган сафар қатнашчилари янги технологиялар ҳақида маълумотга эга бўлиб, уларни ўзларининг ишларида муваффақиятли тадбиқ этишди.
Шунингдек, ассоциация аъзолари ҳамкорлар билан танишиб, улар билан қулай шароитларда ўз маҳсулотларини сотиш ёки хом-ашё харид қилишбўйича келишувга эришгани бўйича кўплаб мисоллар мавжуд.
Ассоциация пайдо бўлгандан буён бутун давр мобайнида 300 дан ортиқ компания унинг аъзоси бўлди, 15 та халқаро конференция ва форум, Canton Fair кўргазма ташкилотчилари ва МДҲ давлатлари тадбиркорлари билан 6 та телекўприк, хориж мамалакатларига 7 та бизнес тур уюштирдик (80 дан зиёд иштирокчилар), чет эллик делегациялар билан 70 та амалий ва b2b-учрашувлар ва тадбиркорлар учун 30 га яқин очиқ семинарлар ўтказдик.
Келажакда, ўз аъзоларимиз номидан савол ва таклифлар билан давлат органларига мурожаат қилишни режалаштиряпмиз.Ўзбекистон раҳбариятининг кичик бизнес ва хусусий тадбиркорликни қўллаб-қувватлашга қаратилган стратегик йўлини эътиборга олсак, ушбу ҳаракатимизнинг иш беришига ишончим комил. 2017 йилнинг «Халқ билан мулоқот ва инсон манфаатлари йили» деб эълон қилиниши бунга яққол мисол бўла олади.
– Тадбиркорлар бу каби ассоциацияларга қандай муносабатда бўлмоқда?
Тан олиш керак, тадбиркорлик маданияти шаклланиш босқичида турибди. Шунинг учун кўпчилик тадбиркорлар ассоциацияларга аъзоликка, афсуски, ишончсизлик билан қарашади. Биз билан ҳамкорлик қилиб, компаниялар қандай фойда ва имкониятларга эга бўлишини сўзлаб берамиз. Бунда хорижий давлатлардаги бизнес ривожлантиришнинг локомотиви даражасигача кўтарилаёзган худди шундай ассоциациява бирлашмаларнинг тажрибасига мурожаат қиламиз. AMBiT давлат муассасаси ҳисобланмайди, лекин кичик бизнес ва хусусий тадбиркорлик масалалари билан шуғулланувчи давлат органлари билан, уларнинг манфаатларини ёқлаган ҳолда ишлаш бизнинг узоқ муддатли мақсадимиз ҳисобланади.
– Таълимий лойиҳалар ҳақида бироз сўзлаб берсангиз.
Чет эл ёки маҳаллий экспертларни таклиф этган ҳолда ҳамкорларимиз билан биргаликда турли хил семинарлар ташкил қиламиз. Хусусан, тор доирада ихтисослашган мутахассислар семинарлари (масалан, MASHAV кўмагида); Be the Change компанияси билан ҳамкорликда жаҳон даражасидаги спикерлар; 2 ойда бир ўтказиладиган Ўзбекистоннинг етакчитадбиркорлари иштирокида турли йўналишдаги очиқ семинарлар. Семинарлар ҳақида сайтимизда (www.ambit.uz) ва Facebook саҳифамизда (www.facebook.com/AMBiT.уз) ёритиб борамиз.
– Ва барча учун аънанавий интервью савол: келажак режалари ҳақида.
– Бизда 2020 йилга бориб мамлакатдаги илғор 500 компанияни ўзида бирлаштирган Ўзбекистондаги етакчи бизнес-ассоциацияга айланиб, халқаро стандартлар бўйича бизнес юритувчи ва мамлакатимизда тадбиркорликни ривожлантиришга ўз ҳиссасини қўшувчи ишбилармонлар ҳамжамиятини барпо этиш бўйича аниқ мақсадлар мавжуд.
AMBiT аъзолик масалалари бўйича: (90) 938 00-25 рақами ёки info@ambit.uz орқали мурожаат қилишингиз мумкин.
Реклама ҳуқуқи асосида
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)