Ҳиндистон полицияси Уттар-Прадеш штати ўрмонида маймунлар билан бирга яшаган қизалоқнинг шахсини аниқлашга ҳаракат қилмоқда, дея хабар берди TJournal.
Бир неча ҳафта аввал ўрмондан топилган қизалоқ гапиришни билмайди. Полициянинг маълумотига кўра, у 8—10 ёш атрофида.
Шифокорларнинг айтишича, қизалоқ маймунлар каби ҳар хил ҳаракат ва имо-ишоралар орқали мулоқот қилмоқда. Ҳуқуқ-тартибот ходимлари уни топганида, қиз маймунлар орасида уларга тақлид қилган ҳолда ўйин ўйнаётган бўлган.
Маймунлар тўдасидаги қизчани Непал билан чегарадош Катарниагхат табиат қўриқхонаси яқинидаги қишлоқ аҳолиси пайқаб қолиб, бу ҳақида полицияга хабар берган.
Полиция вакили Сураш Ядавнинг айтишича, полициячилар қизни олиб кетишга ҳаракат қилганида маймунлар уларга ҳужум қилган.
Шифокорлар қизнинг озиб кетгани, танасида эса жароҳатлар борлигини маълум қилган. Аввалига у бир жойда ўтира олмаган ва хона бўйлаб тўрт оёқлаб юрган.
Ҳозирда қизалоқ ўзини яхши ҳис қилмоқда. Кейинроқ қиз таълими ва ижтимоий мослашувига ғамхўрлик қиладиган ижтимоий хизмат вакилларига топширилади.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)