Буюк Британия ташқи ишлар вазири Борис Жонсон Россияга 10 апрелга белгиланган ташрифини бекор қилди. Бу ҳақда Meduza хабар бермоқда.
«Суриядаги воқеалар ривожи вазиятни буткул ўзгартирди», — дейилади Жонсоннинг Буюк Британия ТИВ сайтида эълон қилинган баёнотида. Қайд этилишича, Россия «тинч аҳолига нисбатан кимёвий қурол қўлланганидан кейин ҳам Асад тузумини қўллаб-қувватлашда давом этмоқда».
«Мен 10 апрель, душанба куни Москвага бормайман. Менинг асосий мақсадим — ‘Катта еттилик’ бўйича ҳамкорлар билан Сурия ва Асаднинг Россия томонидан қўллаб-қувватланиши масалаларини муҳокама қилишдир», — деб ёзди Жонсон Twitter’даги саҳифасида.
2016 йил ёзида Британия ташқи ишлар вазирига айланган Борис Жонсон март ойи охирида Москвага келиши лозим эди, бироқ НАТО мамлакатлари тақши ишлар вазирлари учрашуви санасининг ўзгариши туфайли, ташриф номаълум муддатга қолдирилган эди. Буюк Британия ташқи ишлар вазирининг Россияга сўнгги ташрифи 2012 йил май ойида амалга оширилган.
4 апрель куни Суриянинг Идлиб вилоятида авиазарбадан сўнг бир неча ўнлаб одам ҳалок бўлди. Ҳалок бўлганлар ва кўплаб жабрланувчиларда кимёвий заҳарланиш белгилари бор эди.
Ғарб мамлакатлари президент Башар Асад тузумини кимёвий қуролдан фойдаланганликда айблади. Россия эса тақиқланган қуролни ишлаб чиқариш билан террорчилар шуғуллангани ҳақида баёнот берди.
Суриянинг кимёвий қурол қўллашига жавобан АҚШ 7 апрель куни Сурия қуролли кучлари фойдаланадиган аэродромга ракета зарбалари берди. Оқибатда бир неча киши, жумладан, тинч аҳоли вакиллари қурбон бўлди. Шундан сўнг Россия Сурияда ҳаво ҳодисалари олдини олиш бўйича АҚШ билан ҳамкорлик қилишни тўхтатишини маълум қилди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)