Қатар Юлдузлар лигасининг 25-турида ўзбекистонлик футболчилар тўп сурадиган «Ас-Сайлия» клуби 2:2 ҳисобида дуранг ўйнади.
Чемпионлик учун кураш олиб бораётган «Ас-Садд»га қарши ўйинни Санжар Шоаҳмедов ва Темурхўжа Абдухолиқов бошланғич таркибда ўтказди. Ҳисоб 15-дақиқада «Барселона»даги ўйинлари орқали футбол мухлисларига яхши таниш бўлган Хави томонидан очилган бўлса, орадан бир дақиқа ўтиб Шоаҳмедов мувозанатни тиклашга эришди.
Кейинроқ меҳмонлар ҳисобда олдинга чиқиб олишни ҳам уддалаганди. Бироқ 82-дақиқада ҳакам «Ас-Сайлия» футболчисини майдондан четлатиб, мезбонлар учун пенальти қўйиб берди.
Мазкур дуранг натижа «Ас-Садд»нинг чемпионлик учун имкониятини йўққа чиқарди. Боиси, пешқадам «Лаҳвия» мавсум якунига 1 та тур қолганида 4 очкога илгарилаб кетган.
Маълумот учун, Санжар Шоаҳмедов Қатар Юлдузлар лигасининг 9 та ўйинида майдонга тушиб, 2 та гол уришга муваффақ бўлди. Темурхўжа Абдухолиқовга эса 9 та ўйинда 5 та гол уриш насиб қилди.
Қатар Юлдузлар лигаси 25-тур 6 апрель, пайшанба
«Ас-Садд» — «Ас-Сайлия» 2:2
Голлар: Хави, 15 (1:0). Санжар Шоаҳмедов, 16 (1:1). Лазар, 71 (1:2). Бунежоҳ, 83-пен (2:2).Четлатиш: Ҳаддаф, 81 (Меҳмон).
Изоҳ (0)