Мосулда ИШИД жангарилари Ироқ ҳарбий вертолётини уриб туширди

ИШИД террорчилик ташкилоти жангарилари Мосул ғарбида Ироқ армиясига тегишли вертолётни уриб туширди, дея хабар бермоқда «Коммерсантъ».

Reuters’нинг Ироқ аксилтеррор операциялар қўмондонлиги штабига асосланиб хабар беришича, ҳаво кемасининг икки учувчиси ҳалок бўлган.

Ироқ армияси баёнотига кўра, вертолёт Мосулнинг ғарбий қисмини ИШИД жангариларидан тозалаётган махсус бўлинмага ҳаводан кўмак бераётган эди.

Қўмондонлик ахборотига кўра, бу Мосулда ИШИД жангариларига қарши операция бошланганидан бери қулаган илк ҳаво кемасидир.

Эслатиб ўтамиз, Ироқ қуролли кучлари Мосулнинг ғарбий қисмини ИШИДдан озод этиш бўйича операцияни давом эттирмоқда.

Катталиги бўйича Ироқнинг учинчи шаҳри ҳисобланган Мосул 2014 йилдан бери ИШИД назорати остида бўлиб, унинг норасмий пойтахти саналар эди.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.

«Дарё»нинг Telegram’даги расмий канали — @toshqindaryo’га аъзо бўлинг!