GSM Arena нашри Samsung Galaxy S8 смартфонининг баланд нархи қанчалик ўринли эканлиги борасида сўров ташкил қилди, деб ёзади «Корреспондент.net». Сўров иштирокчиларининг 72 фоизи гаджетнинг нархи ҳаддан ташқари баланд деган фикрни билдирди.
Сотилаётган бозордан келиб чиқиб, Samsung смартфонининг нархи кичик модель учун 720 доллар ёки 800 еврони, катта модель учун эса 840 доллар ёки 900 еврони ташкил қилади.
Кўпчилик фойдаланувчилар Корея компанияси флагманининг нарх ва сифати нисбатини изоҳлар экан, унга ошириб нарх қўйилганини таъкидлади.
Бунинг устига, бу ерда бошқа ишлаб чиқарувчиларнинг флагманлари ҳам рол ўйнайди, хусусан, Хитой компанияларининг баъзи смартфонлари шунга ўхшаш хусусиятларга эга бўла туриб, баъзан икки карра арзонроқ нархда сотилади.
OnePlus ва Xiaomi компаниялари яқинда ўз флагманларини тақдим этиши кутилмоқда. Уларнинг қурилмалари ҳам Galaxy S8 каби Snapdragon процессори билан жиҳозланади, аммо бор-йўғи 300—400 доллардан сотилади.