Венесуэла президенти новвойларга қарши «уруш эълон қилди»

Венесуэла президенти Николас Мадуро маъмурияти мамлакатдаги иқтисодий инқироз ва «нон уруши»нинг авж олиши сабаб уннинг 90 фоизини нон ёпишга, қолган 10 фоизини эса торт ва бошқа ширинликлар ишлаб чиқаришга йўналтириш ҳақида қарор чиқарди, дея хабар беради «Газета.ru».

Мамлакат раҳбариятининг қайд этишича, нон тақчиллигига мижозларнинг асосий эҳтиёжини четлаб ўтиб, ўз фойдасини кўзлаган новвойхоналар сабабчи. Венесуэлада нон нархи ҳукумат томонидан назорат қилинади.

Мадуро пойтахт — Каракасдаги 709 та новвойхонага назоратчилар йўналтирилганини эълон қилди. Қабул қилинган қарорга бўйсунмаганларга жарима ва маҳсулотини тортиб олиш билан таҳдид қилинмоқда.

«Нонни халқдан яшираётган чайқовчилар ўз қилмишига жавоб беради. Қасам ичаманки, улар барчаси учун жавоб беради. Нон урушига жавобгар шахслар сиёсий таъқибга учрагани учун ҳасрат қилмагани маъқул», — дейди Мадуро.

Новвойлар федерацияси — Февипан захира унисиз ортиқча нон ишлаб чиқара олмаслигини айтмоқда.

Аввалроқ, Венесуэлада фавқулодда ҳолат тартибини олтинчи маротаба узайтирилган эди.

«Дарё»нинг Telegram’даги расмий канали — @toshqindaryo’га аъзо бўлинг!