Жорий йилнинг 14—16 март кунлари Project Hope лойиҳаси Қозоғистон филиали томонидан ОИТС, сил ва безгакка қарши курашиш бўйича Глобал Жамғармаси (сил компаненти) кўмагида Осиё мамлакатлатлари журналистлари учун медиа-тур ташкил этилди. Мазкур медиа-турда Ўзбекистон, Қирғизистон, Тожикистон ва Қозоғистон давлатларининг журналистлари иштирок этмоқда. Бу ҳақда журналист Дилрабо Курязова «Дарё»га маълум қилди.
Тадбирни ташкил этишдан асосий мақсад мигрантлар ўртасида сил касаллигини олдини олиш, мигрантларда учрайдиган сил касаллигини даволашга кўмаклашиш ҳамда мазкур мавзуни Осиё мамлакатлари ОАВ орқали кенг ёритишдан иборат.
Тадбирнинг биринчи кунида журналистлар ўз фаолиятлари ҳамда медиа-турдан кутилаётган натижалар ҳақида қисқача маълумот бериб ўтди.
Тадбирда Project Hope лойиҳаси Қозоғистон филиали мутахассислари томонидан мигрантлар ўртасида сил касаллигини олдини олиш юзасидан амалга оширилаётган ишлар хусусида статистик маълумотлар тақдимоти ташкил этилди. Шундан кейин медиа тур иштирокчилари Қозоғистон Республикасининг сил касалликлари миллий-илмий Маркази ҳамда Олмаота шаҳрида жойлашган туманлараро силга қарши диспансери фаолияти билан яқиндан танишди.
Мазкур тиббиёт муассасаларида малакали мутахассислар томонидан сил касаллигига чалинган беморлар учун яратилган шарт-шароитлар, фитизиатор шифокорлар томонидан амалга оширилаётган илмий-амалий изланишлар ҳамда замонавий тиббий хизматлар хусусида батафсил маълумот тақдим этилди. Медиа-тур давомида журналистлар бевосита сил касаллиги билан оғриган мигрант беморлар билан мулоқот қилиш имкониятига ҳам эга бўлди.
Мазкур медиа-турда Осиё мамлакатлари журналистлари учун силга қарши курашиш мавзусини ёритиш юзасидан замонавий ва интерактив дастурлар ўрин олган бўлиб, тадбир яна икки кун давом этиши режалаштирилган.
Изоҳ (0)