Депутатлар ёрдамида Қува туманидаги 1000 га яқин хонадонга газ баллонлари етказиб берилди
Ўзбекистон Республикаси Олий Мажлиси Қонунчилик палатасининг 15 нафар депутатлари ва Сенат аъзоларидан иборат ишчи гуруҳ март ойининг дастлабки ўн кунлигида Қува туманида аҳоли билан мулоқот ўтказиб, соҳалар бўйича ўрганишлар олиб борди. 10 март куни ишчи гуруҳ томонидан амалга оширилган ўрганиш якунларига бағишланган халқ депутатлари Қува тумани Кенгашининг йигирма тўққизинчи сессияси ўтказилди. Бу ҳақда вилоят ҳокимлиги матбуот хизмати хабар бермоқда.
Сессияда халқ депутатлари Қува туман Кенгаши депутатлари билан бирга вилоят бошқармалари ва тегишли ташкилотлари, тумандаги ташкилот, корхона ва муассаса, ҳуқуқни муҳофаза қилувчи органлар раҳбарлари, давлат ва жамоат ташкилотлари мутасаддилари, фуқароларни ўзини ўзи бошқариш органлари вакиллари ҳамда оммавий ахборот воситалари ходимлари қатнашди.
Шунингдек, сессия ишида Ўзбекистон Республикаси Олий Мажлиси Қонунчилик палатаси Cпикери Нуриддинжон Исмоилов, спикер ўринбосари Ҳотамжон Кетмонов, Фарғона вилояти ҳокими, Олий Мажлис Сенати аъзоси Шуҳрат Ғаниев, Қонунчилик палатаси депутатлари ҳамда Сенат аъзолари иштирок этди.
Сессияга халқ депутатлари Қува туман Кенгаши депутати Нўъмонжон Ўрмонов раислик қилди.
Кун тартибига қўйилган Ўзбекистон Республикаси Олий Мажлиси Қонунчилик палатаси депутатлари ҳамда Сенат аъзолари томонидан 2017 йилнинг 1—10 март кунлари Қува туманида ҳудудни ривожлантиришнинг энг муҳим вазифаларини ҳал этишга, фуқароларнинг ҳуқуқлари ва эркинликларини таъминлашга доир ўтказилган ўрганиш натижалари тўғрисидаги масала юзасидан Олий Мажлис Қонунчилик палатаси депутати, республика ишчи гуруҳи раҳбари Мавлуда Хўжаева ахборот берди.
Ўрганиш ва мулоқотлар давомида аҳоли томонидан билдирилган мурожаатларнинг 283 таси жойида ҳал этилди. Жумладан, 28 нафар фуқаронинг тадбиркорлик фаолиятини бошлаши учун кредит олиш билан боғлиқ муаммолар тумандаги тижорат банкларини жалб қилган ҳолда ҳал этилди. Ҳомийлар кўмаги билан 4 нафар фуқарога ногиронлик аравачаси олиб берилиши таъминланди. Тегишли муассаса ходимлари кўмагида 7 нафар беморнинг ногиронлик нафақасига чиқишига амалий ёрдам берилди. Тошҳовуз ва Янги ҳаёт кўчаларига ноқонуний ташланган 400 тоннадан ортиқ маиший чиқиндилар шу ишга масъул ташкилотларни жалб қилган ҳолда туман марказий ахлатхонасига чиқариб ташланди. 1000 га яқин хонадонларга газ баллонлар этказиб беришга амалий ёрдам кўрсатилди.
Шу билан бирга, жойларда кўтарилган 741 та масалани ҳал этиш юзасидан маҳаллий давлат ҳокимияти органлари ва бошқа ташкилотларга тегишли таклиф ва тавсиялар берилди. Бундан ташқари, ҳудудларда аҳолини ўйлантираётган вилоят ва республика даражасида ҳал қилиниши лозим бўлган масалалар ҳам белгилаб олинди.
Кун тартибига қўйилган масала юзасидан тегишли қарор қабул қилинди.
