Халқ депутатлари Сурхондарё вилояти Кенгашининг навбатдаги сессиясида Сенат ҳузуридаги Ички ишлар органларининг жиноятчиликка қарши курашиш ва ҳуқуқбузарликлар профилактикаси борасидаги фаолияти устидан парламент ва жамоатчилик назоратини амалга ошириш бўйича комиссиянинг вилоят ҳудудий комиссияси томонидан олиб борилган ўрганишлар натижаси муҳокама этилди. Бу ҳақда ЎзА хабар бермоқда.
Видеомулоқот шаклида ташкил этилган сессияда парламент ва жамоатчилик назоратини амалга ошириш бўйича ҳудудий комиссия томонидан вилоят ички ишлар бошқармасининг жиноятчиликка қарши курашиш ва ҳуқуқбузарликлар профилактикаси бўйича фаолияти ўрганилди.
Таҳлил натижаларига кўра, 2016 йил умумий жиноятчилик 0,2, оғир ва ўта оғир жиноятлар 14,5, унча оғир бўлмаган жиноятлар 2,9 фоизга камайган.
Бироқ айрим соҳалардаги профилактик тадбирлар сифатли, таъсирчан шаклларда ўтказилмагани оқибатида оғир тан жароҳати етказиш, фирибгарлик, ўғирлик, мулкни қасддан нобуд қилиш каби жиноятлар ошган.
Сариосиё, Термиз, Узун туманларида умумий жиноятчилик, Олтинсой, Шўрчи, Қизириқ, Денов, Музработ, Қумқўрғон туманларида фирибгарлик, Термиз шаҳри, Ангор, Бойсун, Жарқўрғон, Шеробод, Термиз туманларида ўғирлик, Бойсун, Денов, Музработ, Шеробод, Қизириқ туманларида безорилик жиноятлари кўпайган.
Вилоятда аниқланган 400 дан зиёд ичкиликка ружу қўйган шахс билан профилактика инспекторлари ва маҳалла фуқаролар йиғинлари кенг жамоатчилик ҳамкорлигида тизимли равишда иш олиб бориши зарурлиги таъкидланди.
Шунингдек, хотин-қизлар ва ёшлар ўртасида жиноятчилик, турли ҳуқуқбузарликлар профилактикасини кучайтириш, вояга етмаганлар ноқонуний хорижга чиқиб кетишининг олдини олиш, ўқувчи-ёшларни таълим муассасаларига тўлиқ қамраб олиш учун ички ишлар органлари, маҳалла ва таълим муассасалари ҳамкорлигини янада мустаҳкамлаш бўйича тегишли тавсиялар берилди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)