Ўзбекистон ва Франция ўртасида дипломатик муносабатлар ўрнатилганининг 25 йиллиги муносабати билан Ўзбекистон Президенти Шавкат Мирзиёевга Франция президенти Франсуа Олланд табрик йўллади.
Ўзбекистон Ташқи ишлар вазирлиги ахборотига кўра, табрикда шундай дейилади: «Алоқалар ўрнатилганининг биринчи кунлариданоқ ҳамкорликнинг барча соҳаларида — ҳам сиёсий, ҳам иқтисодий ва маданий жабҳаларда мустаҳкамланганлигини қайд этиш бугун мени қувонтиради».
Франсуа Олланд ўтган давр мобайнида Франция ва Ўзбекистон дўстона муносабатлар ўрнатишга эришганлигини таъкидлади.
Франция Президенти «ишонч ва ўзаро ҳурматга асосланган мамлакатларимиз ўртасида ўрнатилган шерикчиликнинг юқори даражаси кейинги ўн йилликлар давомида доимо ривожланиши»га умид билдирди.
Ўзбекистон Президенти Шавкат Мирзиёев президент Франсуа Олланд номига йўллаган мактубида қайд этганидек «Франциянинг 1992 йил январь ойида Ўзбекистон мустақиллигини биринчилардан тан олгани, шунингдек, унинг мустақил ривожланиши ва суверенитетини қатъий қўллаб-қувватлаганини биз алоҳида қадрлаймиз».
Ўзбекистон Президенти «Франция билан икки ва кўп томонлама кун тартибнинг барча масалалари бўйича, аввало сиёсий-дипломатик ва маданий-гуманитар соҳаларда самарали ва ўзаро манфаатли ҳамкорликни янада ривожлантириш, шунингдек, савдо, инвестиция ва юқори технологиялар, туризм, корхоналаримизда илғор корпоратив бошқарув методларини киритиш жабҳаларида аниқ дастурлар ва лойиҳаларни илгари суришга Ўзбекистон содиқ» эканлигини тасдиқлади.
Ўзбекистон Президенти «Ўзбекистон—Франция муносабатларини чуқурлаштириш ва унинг ўзаро ҳурмат, тенглик ва ишонч тамойилларига асосланган пойдеворини мустаҳкамлашга қаратилган қўшма фаолиятни бундан кейин ҳам давом эттириш»га ишонч билдирди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)