Ўзбекистонда 1 октябрдан миллий ҳайдовчилик гувоҳномаси ва автомотранспорт воситаси рўйхатдан ўтказилганлиги тўғрисидаги гувоҳноманинг янги, пластикдан тайёрланган намуналари жорий этилади. Ҳукуматнинг бу ҳақдаги 2 март куни имзоланган қарори ИИВ сайтида эълон қилинди.
Янги намунадаги ҳужжатлар миллий ҳайдовчилик гувоҳномасининг Йўл ҳаракати тўғрисидаги Конвенция (Вена шаҳри, 1968 йил 8 ноябрь) тавсияларига мувофиқлигини таъминлаш, миллий ҳайдовчилик гувоҳномаларини ҳамда автомототранспорт воситаси рўйхатдан ўтказилганлиги тўғрисидаги гувоҳномаларни рўйхатдан ўтказиш ва ҳисобга олиш тизимига замонавий ахборот-коммуникация технологияларини жорий этишни самарали ташкил этиш мақсадида жорий этилмоқда.
1 октябрдан бошлаб ҳайдовчилик гувоҳномасини расмийлаштиришда — ҳайдовчилик гувоҳномасининг, автомототранспорт воситасини рўйхатдан ўтказишда (қайта рўйхатдан ўтказишда) — автомототранспорт воситаси рўйхатдан ўтказилганлиги тўғрисидаги гувоҳноманинг янги намуналари берилади.
Янги намунадаги миллий ҳайдовчилик гувоҳномаси берилган кундан бошлаб 10 йил муддатга берилади. Амалдаги ҳайдовчилик гувоҳномаларини янги намунадагиларига алмаштириш 2017 йил 1 октябрдан 2018 йил 31 декабргача — эски намунадаги миллий ҳайдовчилик гувоҳномалари учун, уларнинг берилган санасидан қатъи назар — улар эгасининг ёзма аризасига кўра ихтиёрий равишда, 2019 йил 1 январдан 2020 йил 31 декабргача эса — эски намунадаги барча миллий ҳайдовчилик гувоҳномалари учун, уларнинг берилган санасидан қатъи назар — мажбурий тартибда амалга оширилади.
Автомототранспорт воситаси рўйхатдан ўтказилганлиги тўғрисидаги гувоҳномани янги намунадаги гувоҳномага алмаштириш 2017—2020 йиллар мобайнида босқичма-босқич — автомототранспорт воситасини мажбурий техник кўрикдан ўтказишда амалга оширилади.
Эски намунадаги миллий ҳайдовчилик гувоҳномалари ҳамда автомототранспорт воситаси рўйхатдан ўтказилганлиги тўғрисидаги гувоҳномалар 2021 йил 1 январдан бошлаб ҳақиқий эмас деб ҳисобланади.
Автомототранспорт воситаларини рўйхатдан ўтказиш (қайта рўйхатдан ўтказиш) тартиби тўғрисидаги низомга, рўйхатдан ўтказиш тартиботларини соддалаштиришни назарда тутган ҳолда, ўзгартишлар киритиш кўзда тутилган.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)