Ислом Каримов номидаги Тошкент давлат техника университетида «Ўзбекистонда таълим, фан ва маданиятнинг модернизациясини таъминлашда Ислом Каримовнинг роли» мавзуида илмий-амалий конференция бўлиб ўтди, дея хабар бермоқда ЎзА.
Президент Шавкат Мирзиёевнинг 2017 йил 25 январдаги «Ўзбекистон Республикасининг Биринчи Президенти Ислом Абдуғаниевич Каримовнинг хотирасини абадийлаштириш тўғрисида»ги қарорига мувофиқ ташкил этилган анжуманда Ўзбекистон Республикаси Фанлар академияси, Ўзбекистон қишлоқ хўжалиги илмий-ишлаб чиқариш маркази академиклари ва мухбир аъзолари, олий таълим муассасалари профессор-ўқитувчилари, илмий ходимлари ва талаба-ёшлар иштирок этди.
Ислом Каримовнинг серқирра фаолияти, Ўзбекистон Республикасини мустақил ва демократик давлатга айлантиришдаги буюк тарихий хизматлари, мамлакатда таълим, фан ва маданиятни ривожлантиришда амалга оширган беқиёс ишлари самараларига бағишланган маърузалар тингланди. Уларда буюк давлат арбоби раҳнамолигида мамлакатда таълим тизими тубдан ислоҳ этилиб, эртанги куннинг муносиб давомчилари бўлган баркамол авлодни вояга етказишга алоҳида эътибор қаратилгани, қабул қилинган соҳага оид қонунлар, фармонлар, давлат дастурларига биноан таълим муассасалари янгидан қурилгани, таъмирлангани, энг замонавий ўқув анжомлари билан таъминлангани қайд этилди.
Анжуманда Ислом Каримовнинг ижтимоий-сиёсий мавзуларда яратган асарларини ўрганиш масалаларига алоҳида эътибор қаратилди.
Конференцияда ёшларни илмий фаолиятга кенг жалб қилиш, илмий-тадқиқот ишлари самарадорлигини юқори даражага кўтариш, фан, таълим ва ишлаб чиқариш интеграцияси ҳамда олий малакали илмий ва илмий-педагог кадрларни тайёрлаш масалаларига эътибор қаратилди. Олий таълим муассасаларида олиб борилаётган илмий тадқиқотлар натижалари иқтисодиётнинг тегишли соҳаларига татбиқ қилинишига эришиш, кадрлар тайёрлаш тизимида илм-фаннинг узвийлигини қарор топтириш, янги замонавий илмий лабораториялар фаолиятини юқори савияда ташкил этиш ва улардан унумли фойдаланиш бугунги кунда олий таълим муассасалари профессор-ўқитувчилари олдида турган энг муҳим вазифалардан эканлигига урғу берилди.
Тадбир доирасида Ислом Каримовнинг мазкур олий таълим муассасасидаги талабалик йиллари ҳақида ҳикоя қилувчи кўргазма ташкил этилди.
Изоҳ (0)