Америкалик генерал АҚШнинг Суриядаги ҳарбий иштироки кенгайтирилиши мумкинлигини айтди

АҚШ қуролли кучлари марказий қўмондонлиги раҳбари Жозеф Вотель (у Яқин Шарқ учун ҳам масъул) Америка қўшинларининг Суриядаги иштироки кенгайтирилиши мумкинлигини маълум қилди, деб ёзади «Коммерсантъ». Бу Раккани ИШИД террорчилик ташкилотидан озод этиш бўйича операцияларнинг аввалги шиддатини қўллаб-қувватлаш зарурати билан боғлиқ.

Генералнинг фикрича, АҚШ кўмагида фаолият юритувчи Сурия ҳарбий қисмлари кераклича ҳаракатчанликка ва қувватга эга эмас. «Биз уларда мавжуд бўлган баъзи етишмовчиликларни тўлдиришга тайёр бўлишимиз керак. Бу ўқ ёғдириш бўйича қўшимча кўмак беришимизни ва бошқа воситаларни ажратишимизни талаб қилиши мумкин», — деди у.

Аммо, Вотелнинг сўзларига кўра, Пентагон Сурияга қўшимча жанговар бўлинмаларни юбормоқчи эмас. Шу билан бирга, унинг ўзи эришилган суръатларни сақлаб қолиш ташвишида эканлигини билдирди. У ҳозирда мавжуд бўлинмаларни, айни пайтда АҚШ Ироққа нисбатан амалга ошираётгани каби, уларга фронт орти ва ўқ ёғдириш бўйича кўмакларни кўрсатиш орқали кучайтириш вариантини таклиф этди.

CBS маълумотларига кўра, яқин орада Пентагон АҚШ президенти Дональд Трампга Ироқ ва Сурияда ИШИДга қарши жанговар ҳаракатларни кучайтириш режасини тақдим этади.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.