2016 йилда Қашқадарёда паррандачилик соҳасида 160 дан ортиқ лойиҳа амалга оширилди ва илк бор ташқи бозорга 200 минг долларлик тухум экспорт қилинди. Бу ҳақда «Дарё»га вилоят божхона бошқармаси ахборот хизмати хабар берди.
— Ўтган йили экспорт қилинган 200 минг долларлик тухум маҳсулоти 9 та божхона юк декларацияси асосида тўлиқ электрон тарзда масофадан туриб расмийлаштирилди. Бу эса тадбиркорларнинг қимматли вақтини тежаш имкониятини яратди, — дейди «Китоб» ташқи иқтисодий фаолият божхона пости бошлиғи Хуршид Мирзаев. — Ўзбекистон Республикаси Президентининг тегишли Фармонига мувофиқ, жорий йил 1 январидан товарларни божхона расмийлаштирувини белгиланган жойлардан бошқа жойларда амалга оширганлик учун йиғим амалдаги энг кам ойлик иш ҳақининг 10 фоизидан икки баробарга камайтирилди.
Маҳсулотларни экспортга расмийлаштиришда жорий қилинаётган бу каби имконият ва қулайликлар натижасида жорий йилда тухум экспорти ҳажми бир неча баробарга ошди ва январь ойининг ўзида қиймати 438 минг долларлик 7 миллион донадан зиёд тухум экспорт қилинди.
— Хорижий харидорлар билан ҳамкорлик қилиш давомида шунга ишонч ҳосил қилдикки, ташқи бозорда тухумга талаб юқори, — дейди Яккабоғ туманидаги «Кумуш куз файзи» масъулияти чекланган жамияти раҳбари Мақсуд Камолов. — Шу вақтга қадар маҳсулотимизни ички бозорга сотган бўлсак, эндиликда унинг бир қисмини экспортга йўналтириш имконига эгамиз. Ўтган йили афғонистонлик ҳамкорларимизга 60 минг долларликдан зиёд тухум етказиб бердик. Ушбу ҳамкорлигимиз жорий йилда ҳам давом эттирилади. Шунингдек, бошқа мамлакатларда ҳам маҳсулотимизни сотиб олиш истагидаги харидорлар бор.
Шаҳрисабз туманида фаолият юритаётган «Эко парранда» масъулияти чекланган жамияти бундан 5 йил аввал ташкил этилган. Айни пайтда корхона фабрикасида боқилаётган товуқлар сони 80 минг бошга етган. «Хай-лайн» зотига мансуб бу товуқлар касалликка чидамлилиги ва маҳсулдорлиги билан ажралиб туради.
— Фабрикамизда товуқларни озиқлантиришдан тортиб тухумларни йиғиб олишгача бўлган барча жараён автоматлаштирилган ҳолда бажарилади, — дейди жамият раҳбари Муҳиддин Умидов. — Кунига ўртача 10 минг дона тухум олинади. Маҳсулот ишлаб чиқариш қувватини ошириш бўйича иш олиб боряпмиз. Тез орада қиймати 1 миллион доллардан ортиқ қўшимча лойиҳани амалга ошириш бўйича ишлар якунланади. Натижада фабрикада боқиладиган товуқлар сони 120 минг бошга ортади, 30 та янги иш ўрни яратилади.
Тадбиркорнинг қайд этишича, ушбу корхона ҳам ўтган йилдан бошлаб четга тухум экспорт қилишга киришган. Қўшни Афғонистон давлатидаги Ихлос фирмаси томонидан 107 минг долларлик маҳсулот харид қилинди. Томонлар жорий йилда ҳам 7 миллион дона тухум етказиб бериш бўйича келишув имзолади. «Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)