Ўзбекистонда нотариал идораларни молиялаштириш тартибига тузатишлар киритилди

Ўзбекистон Республикаси Адлия, Меҳнат ҳамда Молия вазирликлари қарори билан «Давлат нотариал идоралари ва нотариал архивлар фаолиятини молиялаштириш тартиби тўғрисидаги низом»га тузатишлар киритилди. Бу ҳақда Norma хабар бермоқда.

Мазкур қарорга биноан, нотариал идоралар ва нотариал архивлар фаолиятини молиялаштириш манбаи ҳисобланадиган ажратмалар миқдорига тузатишлар киритилди. Ушбу тузатишлар, жумладан, қуйидагилардан иборат:

Нотариал ҳаракатларни амалга оширганлик учун нотариуслар томонидан ундириладиган давлат божи суммасидан 10% миқдоридаги ажратмалар (илгари— 15%);

Нотариал идоралар томонидан ҳуқуқий ва техник тусдаги қўшимча ҳаракатлар кўрсатилганлиги учун тушумлар;

Герб йиғимидан тушадиган маблағларнинг 50 фоизи (олдин — герб йиғимининг барча суммаси) — гербли бланкалар тайёрлаш ҳамда бошқа шахсга бериш тақиқланган ва хатлаб қўйилган автомототранспорт воситалари тўғрисидаги электрон маълумотлар банкини яратиш, шунингдек, нотариал идоралар ва нотариал архивларнинг моддий-техник базасини мустаҳкамлашга йўналтириш билан;

Судлар ва адлия органларини ривожлантириш жамғармаси маблағлари.

«Дарё»нинг Telegram’даги расмий канали — @toshqindaryo’га аъзо бўлинг!