Паст нархли трансформер ноутбуклар

Трансформер ноутбуклар бир-икки ҳаракат орқали планшетга айлана олиши билан қулайдир. Уларда нафақат қулайлик билан ишлаш, балки чизиш, китоб ўқиш ва фильмлар кўриш ҳам мумкин. Биз трансформерларнинг гаджетларга кўп пул сарфлашга ўрганмаганлар учун мос тушадиган арзон вариантларини топиб қўйдик

HP Stream x360 11-aa000ur

HP’нинг ушбу модели дисплейининг диагонали бор-йўғи 11,6 дюйм, оғирлиги 1,35 кг бўлиб, бундай ихчам кўриниши туфайли уни бемалол олиб юриш мумкин. Ноутбукни 360 даражага очиш орқали, планшетга айлантириш мумкин. Қурилманинг нархи — 300 доллар атрофида.

Афсуски, паст нарх қурилманинг баъзи хусусиятларига ўз таъсирини ўтказмасдан қолмаган. Чунончи, ноутбук атиги 2 Гб тезкор хотирага эга, доимий хотира ҳам катта эмас — 32 Гб.

Acer Aspire R3-131T-C08E

Acer компаниясининг ноутбуки ҳам худди HP модели каби хусусиятларга эга. Процессор, хотира ҳажми, диагонал — барчаси бир хил. Аммо бу трансформер оғирроқ, шунингдек, Wi-Fi’нинг фақат охиридан олдинги IEEE 802.11n стандартини қўллаб-қувватлайди. Нархи — аввалги моделдан 15—30 долларга баландроқ.

ASUS Transformer Book Flip TP200SA

ASUS’дан рақобатчи ноутбук ҳам ўша-ўша хусусиятларга эга. Аммо ташқи жиҳатдан у анча фарқланади. У ёрқин ранглар ўрнига, сокин оч жигарранг тусга бўялган, узунасига туширилган чизиқлар эса қурилмага улуғворлик бахш этади. Трансформернинг оғирлиги 1,2 кг, нархи эса — тахминан 350 доллар.

Lenovo Yoga 300 11

Агар Windows’да ишлайдиган ноутбук учун 32 Гб хотира кам деб ҳисобласангиз, қаттиқ диски сиғими каттароқ бўлган моделлар ҳам бор. Масалан, Lenovo’нинг ушбу моделида доимий хотира 500 гигабайтга тенг. Аммо қурилманинг бошқа фарқли жиҳатлари йўқ.

Манба: Интернет тармоғи материаллари