Обама АҚШнинг барча президентлари рейтингида 12-ўринни эгаллади
Америкалик тарихчилар АҚШ президентлари рейтингида Барак Обамани 12-ўринга жойлаштирди, деб ёзади «РИА Новости».
Рейтингни тузадиган C-SPAN телеканали маълумотларига кўра, Обама ўзини энг яхши намоён қила олган соҳа — иқтисодий бошқарув бўлиб, ушбу йўналиш бўйича у саккизинчи ўринни банд этди. Оқ уй собиқ раҳбари энг ёмон кўрсаткичларни конгресс билан муносабат (39-ўрин) ва халқаро алоқалар (24-ўрин) соҳаларида кўрсатган.
Юқори учликка Авраам Линкольн, Жорж Вашингтон ва Франклин Рузвельт кирди. Рўйхатнинг энг пастки поғоналарини Жеймс Бьюкенен, Эндрю Жонсон ва Франклин Пирс эгаллади.
Рейтингни тузишда Американинг етакчи университетларидан 91 нафар тарихчи ва бошқа мутахассислар қатнашди. Улар президентларни жамоатчиликни ишонтира олиш қобилияти, инқироз даврида бошқариш, иқтисодий бошқарув, хулқ бўйича обрўси каби ўнта кўрсаткич бўйича баҳолади.
