Буюк Британиянинг Ҳерефорд шаҳрида яшовчи етти ёшли мактаб ўқувчиси Хлоя Бриджуотер ўз карьерасини Google’да яратишга қарор қилди. У отаси билан компаниянинг бош директорига уни ишга олишни сўраб хат ёзди. Бу ҳақда Business Insider нашрига таяниб, TJournal хабар берди.
Бир неча кундан сўнг Google бош директори қизчага «аризаси» учун миннатдорчилик билдириб, жавоб ёзди ва унга мактабни тугатганидан сўнг ўз резюмесини жўнатишни таклиф қилди.
Қизчанинг отаси Энди Бриджуотернинг сўзларига кўра, у қизи билан ўзи ишлашни хоҳлаган «идеал жой» ҳақидаги суҳбатлашган. Ҳаммаси шундан кейин бошланган. Энди Бриджуотер қизига Google ҳақида гапириб берган ва Google оффисининг қопли курсилар, картинг йўлаклари тасвирланган бир нечта суратини кўрсатган.
Шундан сўнг, Хлояда компанияда ишлаш истаги туғилган ва у отасининг ёрдами билан Google раҳбарига уни ишга олишни сўраб ариза ёзган. Шунингдек, қизча хатда шоколад фабрикасида ишлаш ва Олимпиада ўйинларининг сузиш мусобақасида қатнашиш истаги борлигини ҳам айтган.
12 февралда Энди Бриджуотер ўзининг Linkedin саҳифасида Google бош директори Сундар Пичаидан жавоб хати олганлиги ҳақида хабар берди. Компания раҳбари Хлояга мактуби учун миннатдорчилик билдириб, у, албатта мақсадарига эришишига ишонч билдирган. Кейинроқ Google хатнинг ҳақиқийлигини тасдиқлади.
Энди Бриджуотернинг сўзларига кўра, қизи компания раҳбарининг жавобидан жуда хурсанд бўлди. Хат қизини катта бўлиб, Google’да ишлаш учун чин дилдан ўқишга руҳлантирди. Шунингдек, мактуб қизчага бир неча йил аввал юз берган автоҳалокатдан сўнг ўзига бўлган ишончни қайтаришга ёрдам бериши мумкин.
Google бош директоридек банд инсоннинг етти ёшли қизалоқнинг мактубига жавоб бериш учун вақт топиши ва уни «ўз орзуларига яқинлаштириши» қизчанинг отасини ҳайратга солди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)