Фотогалерея: Қачонлардир яшаган 10 та баҳайбат ҳайвон

Бир замонлар Ер сайёрасида одамлардан бир неча баробар катта бўлган баҳайбат жониворлар ҳукмронлик қилган. AdMe нашри ана шу жониворларнинг фотожамланмасини тақдим қилди.

Амфицелия

Амфицелия – Ер юзида яшаган энг катта ҳайвонлардан бири. Бу турдаги ўтхўр динозаврлар 145 – 161 миллион йил аввал яшаган. Амфицелия битта умуртқасининг узунлиги 2,5 метрни ташкил қилган.

Титанобоа

Титанобоа – бўғма илонларнинг анчагина катта бўлган яқин қариндоши.  Илон 58 – 61 миллион йил аввал яшаган ва узунлиги 13 метргача етган. Ҳозирги кунда Ер юзасида мавжуд йўл-йўл бўғма илоннинг узунлиги 7,5 метргача етиши мумкин.

Мегалодон

Мегалодонлар 3 – 28 миллион йил аввал яшаган шафқатсиз йиртқичлардир. Мегалодоннинг узунлиги 20 метргача, оғирлиги 47 тоннагача етиши мумкин бўлган. Унинг тишлаш кучи 10 тоннага тенг бўлган.

Аргентавис

Аргентавис 5 – 8 миллион йил олдин яшаган. У Ер сайёраси тарихидаги энг катта қушлардан бири. Қанотларини ёйганда уларнинг кенглиги 7 метргача етган. Қуш кемирувчилар билан озиқланган.

Катта шохли кийик

Катта шохли кийиклар икки миллион йил аввал пайдо бўлган. Ўрмонларнинг кенгайиши катта шохли кийикларнинг қирилиб кетишига олиб келган. Кенглиги 5 метрни ташкил қилган шохлари туфайли кийиклар қалин новдалар орасида ҳаракатлана олмаган.

Кичик юзли улкан айиқ

Кичик юзли улкан айиқ (булдог-айиқ) тик турганида бўйи 3,5 - 4,5 метрни ташкил қилган ва жуда кучли жағларга эга бўлган. Айиқ муз даврида Ерда яшаган энг йирик йиртқич сутемизувчилардан бири бўлган. Эркаклари урғочиларига қараганда сезиларли даражада катта бўлган ва оғирлиги 1,5 тоннагача етган. Булдог-айиқ 14 минг йил олдин қирилиб кетган.

Гигантопитек

Гигантопитеклар – барча даврларнинг энг катта одамсимон маймуни. Улар тахминан 1 миллион йил олдин яшаган. Топилган камёб қолдиқларга таяниб, аниқ хулоса чиқариш қийин, бироқ олимларнинг ҳисоблашича, гигантопитекларнинг бўйи 3 – 4 метр бўлган, вазни эса 300 – 550 килограмни ташкил қилиб, асосан, бамбук билан озиқланган.

Парацератерия

Парацератериялар (индрикотериялар) 20 – 30 миллион йил олдин яшаган. Улар ҳозирги каркидонларнинг қариноши бўлган, аммо уларнинг шохи бўлмаган. Уларнинг бўйи беш метргача, вазни эса 20 тоннагача етган. ўзининг баҳайбат ташқи кўринишига қарамасдан, улар йиртқич бўлмаган ва дарахт барглари ҳамда новдалари билан озиқланган.

Кецалькоатль

Кецелкоатл 66 – 68 миллион йил олдин яшаган. Бу энг катта птерозавр ва сайёра тарихида энг катта учувчи ҳайвон бўлган. Қанотларини ёйганда, кенглиги 12 -15 метрни ташкил қилган. Ўлаксалар ва майда умуртқалилар билан озиқланган.

Кўк кит

Кўк кит (ҳаворанг кит) – ҳозирда мавжуд ва сайёра тарихидаги ҳайвонлар орасида энг каттаси. Унинг узунлиги 33 метр, вазни эса 150 тоннани ташкил қилади. У планктонлар ва баъзан майда балиқлар билан озиқланади. ХХ асрнинг 1960 йилларига келиб кўк китлар деярли қириб ташланди, ва уларнинг сони 5000 тани ташкил қилар эди. Ҳозирги кунда уларнинг сони 10000 га яқин ва уларни учратиш жуда қийин ҳисобланади.

Денгиз чаёни

Денгиз чаёни – энг йирик бошоёқли жонзот. Улар 2,5 метргача ўса олган. 248 -510 миллион йил аввал яшаган.

«Дарё»нинг Telegram’даги расмий канали — @toshqindaryo’га аъзо бўлинг!