Эрон ташқи ишлар вазири АҚШнинг миграция ҳақидаги фармонини «бутун миллат учун ҳақорат» деб атади

Эрон ташқи ишлар вазири Муҳаммад Жавад Зариф Дональд Трамп томонидан имзоланган миграция бўйича фармонни «бутун миллат учун ҳақорат» деб атади. Бу ҳақда «РИА Новости» хабар берди.

«Бу бирор марта террорчилик ҳаракатини амалга оширмаган миллат учун ҳақорат бўлди. Сиз америкаликларга қарши терактларнинг бирортасини ҳам уюштирган эронликни топа олмайсиз», — деди Зариф CNN телеканалига берган интервьюсида. У Эрон 11 сентябрь воқеаларидан бошлаб барча терактларни қоралаганини қўшимча қилди.

Зариф, шунингдек, эронлик муҳожирлар АҚШдаги энг ўқимишли ва муваффақиятлиларидан бирлари эканлигини таъкидлади.

«Таҳдидлар ва ҳақоратлар Эрон халқини бирлаштиради, уларнинг ўз давлатини қўллаб-қувватлашини кўрсатади», — деди у.