Грузияни мағлуб эта олмаган Ўзбекистон миллий терма жамоаси ФИФА рейтингида пастга шўнғиди

Футбол бўйича Ўзбекистон миллий терма жамоаси ФИФАнинг янги рейтингида икки поғона пастлади. Бунга қадар 61-ўринни эгаллаб турган жамоа, эндиликда 63-ўринда ифода этилган.

Ўтган ой давомида Ўзбекистон миллий терма жамоаси иккита ўртоқлик ўйинида иштирок этди. Амирликларда Дания олимпия термасига 1:2 ҳисобида имконият бой берилган бўлса, Грузия термаси билан 2:2 ҳисобидаги дуранг қайд этилди.

Данияга қарши учрашув ФИФА рейтингига таъсир кўрсатмайди. Чунки учрашув Дания миллий терма жамоасига қарши эмасди. Грузия билан ўйиндаги дуранг эса ФИФА ҳисобида туради. Боиси беллашув икки мамлакат бош жамоалари ўртасида кечганди.

Ўзбекистон Осиё мамлакатлари орасида Эрон (32), Жанубий Корея (39), Япония (52), Австралия (54) ва Саудия Арабистонидан (56) кейин олтинчи бўлиб турибди.

ЖЧ—2018 саралашида Ўзбекистон билан бир гуруҳдан жой олган термалардан Қатар 85-ўринни эгаллаб турган бўлса, Хитой 86, Сурия 93-поғонада кўрсатилган.

ФИФА рейтингини Аргентина терма жамоаси бошқариб турибди. Ўнталикдан мос равишда Бразилия, Германия, Чили, Бельгия, Франция, Колумбия, Португалия, Уругвай ва Испания термалари жой олган.

Маълумот учун, Самвел Бабаян устозлик қилаётган Ўзбекистон миллий терма жамоаси айни пайтда Туркиянинг Анталия шаҳрида бўлиб турибди. Бугун — 10 февраль куни Россиянинг «Амкар» клубига қарши ўртоқлик ўйини бўлиб ўтса, эртасига Арманистон чемпионатининг амалдаги чемпионига қарши учрашув ташкил этилади. Ҳар икки беллашув ҳам ФИФА рейтингига ўз таъсирини кўрсатмайди.