Ўзбекистон Президенти Шавкат Мирзиёев 3 февраль, жума куни Тошкент шаҳрида амалга оширилаётган бунёдкорлик ва ободонлаштириш ишлари билан танишди. Президент қурилиши давом этаётган объектларни кўздан кечирди, камида икки катта лойиҳанинг рамзий «тамал тоши»ни қўйиб берди, шунингдек, бир гуруҳ адиблар билан мулоқот қилишга ҳам улгурди. «Дарё» Шавкат Мирзиёевнинг 3 февралдаги пойтахт бўйлаб сафарини бир саҳифага жамлади.
Президент «Новза» (собиқ «Ҳамза») метро бекати олдидаги йўл ўтказгич қурилиши билан танишди. «Кўприк Наврўз байрами арафасида ишга туширилиши мўлжалланмоқда», — деб ёзади ЎзА. Шавкат Мирзиёев қурилишнинг бориши билан танишар экан, Тошкентда қўшимча йўллар ва кўприклар барпо этишга эҳтиёж сезилаётганини алоҳида таъкидлади, қурувчиларга ишнинг тез ва сифатли бажарилиши юзасидан тегишли тавсиялар берди. «Ахборот» тарқатган хабарга кўра, Президент шу ернинг ўзида Бунёдкор ва Чўпонота кўчалари кесишмаси («Мирзо Улуғбек» метро бекати олди)да қуриладиган йўл ўтказгич лойиҳаси билан танишган.
Шавкат Мирзиёев Сергелида учта объектда бўлди. Дастлаб туманда янги қурилаётган метро йўналиши бориб кўрилган. Ўзбекистон раҳбари қурилиш ишлари билан танишар экан, бу лойиҳа Ўзбекистон тарихида ягоналигини алоҳида таъкидлади. Шундан сўнг туманда бунёд этилаётган замонавий кўп қаватли уйлар билан танишган. «Мазкур уй-жойлар тақсимотида адолат мезонига қатъий риоя этилиши керак. Шунда халқимизнинг кайфияти яхши, ҳаётдан рози бўлади», — деди Президент. Хабар беришларича, туманда 2021 йилга қадар қурилиши айтилган 500 та янги уйдан 66 таси мустақилликнинг 26 йиллиги арафасида фойдаланишга топширилади.
Сергелига ташриф давомида Президент «Тошкент металлургия заводи» қурилиши билан ҳам танишган. 100 гектар майдонни эгаллаган, қиймати 278 миллион долларлик бу хорижий корхона ишга тушганидан сўнг йилига 500 миллион долларлик маҳсулот ишлаб чиқариши, 1000 дан зиёд иш ўрни яратиши кутилмоқда. «Ахборот» хабарига кўра, Президент бу ерда заводнинг пойдеворини қуйиш маросимида қатнашган.
Тошкентда кўп тармоқли спорт комплекси — «Ҳумо» қурилади. Шавкат Мирзиёев Тошкент шаҳрининг Олмазор ва Бешёғоч кўчалари кесишувидаги ҳудудда барпо этилаётган бу объект қурилишини кўздан кечириб, бундай замонавий спорт иншоотларининг баркамол авлод тарбиясидаги аҳамиятига алоҳида эътибор қаратди, мутасадди раҳбарларга қурилиш жараёнини юқори сифатда амалга ошириш бўйича зарур кўрсатмалар берди. Қайд этиш жоиз, аренада нафақат хоккей матчлари, шорт-трек, фигурали учиш, кёрлинг бўйича мусобақалар, балки баскетбол, волейбол, гандбол, футзал, бокс, таэквондо ва бошқа спорт турлари бўйича ҳам беллашувларни ўтказиш, умумхалқ байрамлари, концертлар, кўргазма ва форумлар ташкил этиш мумкин бўлади.
Шавкат Мирзиёев Яккасарой технопарки ва Тошкентдаги Халқ қабулхонасида ҳам бўлди. Ўзбекистон Президенти Яккасарой технопарки ҳудудидаги лойиҳалар билан танишар экан, бундай кичик саноат зоналарини Тошкентнинг барча туманларида ташкил этиш, уларда кичик бизнес вакилларига кенг имтиёзлар яратиш зарурлигини таъкидлади. Президент бу ерда тадбиркорлар билан мулоқотда ҳам бўлди. Халқ қабулхонаси фаолияти билан танишар экан, Шавкат Мирзиёев шундай деди: «Тошкент шаҳрининг салоҳияти ҳам, аҳоли сони, одамларнинг талаби ҳам бошқа жойлардагидан юқори. Ишни шунга мувофиқ ташкил этиш керак. Бу маскан халқ манфаатларини таъминлайдиган, ишончини қозонадиган даргоҳ, адолат замини бўлсин».
Ўзбекистон Президенти шаҳар бўйлаб сафари давомида бир гуруҳ адиблар билан учрашди. Учрашув Алишер Навоий номидаги Ўзбекистон Миллий боғидаги Шоирлар хиёбонида бўлиб ўтди. Учрашувда Шоирлар хиёбонини янада обод қилиш, ёшларни китобга ошно қилиш, машҳур адиблар ҳаёти ва ижоди билан яқиндан таништириш мақсадида уларни бу даргоҳга мунтазам равишда жалб этиш ҳақида сўз борди. Учрашувда шоир ва ёзувчилар ижод аҳлига, китоб мутолаасига қаратилаётган юксак эътибор учун Президентимизга миннатдорлик билдирди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)