Бешта вазн тоифасида жаҳон чемпионлигини қўлга киритган, профессионал рингда 49 та жанг ўтказиб, барчасида ғалаба қозонган ва енгилмас номини олган боксчи Флойд Мейвезер 2015 йили фаолиятини якунлаган эди. Ўзини афсонавий Муҳаммад Алидан буюк деб ҳисоблаган 39 ёшли боксчи Mayweather Promotions промоутерлик компанияси асосчиси ҳисобланади. Компаниянинг расмий сайтида бокс оламининг машҳур юлдузи бирга ишлаётган ва келажакда уларнинг улкан ютуқларга эришишига ишонаётган 26 нафар чарм қўлқоп устасининг номи эълон қилинди, деб ёзади «Sports.uz». Улар орасида ўзбекистонлик Санжарбек Раҳмонов ҳам ўрин олгани алоҳида аҳамият касб этади.
Жервонта Дэвис, 22 ёш
Натижа: 17-0 (16 КО)
Нимаси билан қизиқ: Мейвезер жамоасидаги энг умидли боксчилардан бири
Кўчада муштлашганидан кейин 5 ёшида бокс залига олиб келинган бу боксчи ҳаваскорлар ўртасида катта тажриба тўплади. Ёш бўлишига қарамай, ҳаваскорлар ўртасида 206 та ғалаба ва 15 та мағлубият қайд этган. Профессионал боксга ўтгач, Мейвезернинг жамоасидагилар орасида биринчи бўлиб жаҳон чемпионлигини қўлга киритди. У бир неча кун олдин IBF йўналиши бўйича жаҳон чемпиони – Пуэрто-риколик Хосе Педрасага қарши рингга чиқди ва рақибини нокаутга учратди.
Санжарбек Раҳмонов, 27 ёш
Натижа: 6-0-1 (3 КО)
Нимаси билан қизиқ: Мейвезер жамоасидаги ягона МДҲ вакили
Санжарбек Раҳмонов Флойд Мейвезер ишонч билдирган МДҲ давлатларининг ягона вакили. Ўзбекистонлик боксчи ҳаваскорлар ўртасида катта тажрибага эга. Санжарбек Осиё чемпиони ва Осиё ўйинлари совриндори саналади. 2015 йили у Флойд Мейвезер компанияси билан шартнома тузди. Ўзбекистон вакили илк жангини машҳур боксчилар Эдриен Бронер ва Шон Портер баҳси олдидан ўтказган. Кейинги беллашуви Флойд Мейвезернинг сўнгги жанги олдидан бўлган. Санжарбек учун профессионал боксдаги дастлабки қадамлари оғир келган, у профессионал боксдаги биринчи спарринг жангидан сўнг фаолиятини тугатишни ўйлаб қолганди. Лекин ҳаммаси ортда қолди. Санжарбек Раҳмонов профессионал боксдаги саккизинчи жангини шу йилнинг 24 февраль куни ўтказади.
Шариф Богере, 28 ёш
Натижа: 29-1 (20 КО)
Нимаси билан қизиқ: Мейвезер жамоасининг энг ғайриоддий боксчиси
Шариф боксга ўз дўстини кузатгани келиб, залда қолиб кетди. У кўчада қуролланган жиноятчилар билан ҳам муштлашди, машғулотлардан кейин ичиш учун сув қидиришига тўғри келди. Ҳамма қийинчиликларни енгган Шариф ҳаваскорлар ўртасида 68 та жангда ғалаба қозониб, 4 тасида мағлубиятга учраган. У беш карра Африка чемпиони ҳам бўлди. Кейин эса профессионал боксга қадам қўйди. 2013 йили боксчи WBA йўналиши бўйича жаҳон чемпионлиги учун жангда аламли мағлубиятга учради.
Эндрю Табити, 27 ёш
Натижа: 13-0 (11 КО)
Нимаси билан қизиқ: Мейвезер жамоасидаги оғир вазнда иштирок этувчи ягона боксчи
Мейвезер компаниясидаги ягона оғир вазнли боксчи. Америкалик бу йигит боксчилар ўртасида одоби билан машҳур. Эндрю нафақат рингда, балки кўчада ҳам умуман номақбул сўзларни ишлатмайди. Бироқ рингдаги важоҳати туфайли «Ҳайвон» деган лақабни орттириб олди.
Латондрия Жонс, 30 ёш
Натижа: 5-0 (2 КО)
Нимаси билан қизиқ: Мейвезер жамоасидаги ягона аёл боксчи
Мейвезер жамоасидаги ягона аёл боксчи. Ўта кучли зарба соҳибаси. Америка қонунчилиги бу қизни 24 йилга қамоққа ҳукм қилмоқчи бўлган. Лекин Латондрия бу жазодан қандай қутилиб қолганини ҳеч кимга айтмайди.
Хосе Варгас, 18 ёш
Натижа: 6-1 (4 КО)
Нимаси билан қизиқ: Профессионал фаолият учун мактабни ташлади
Бу йигитча профессионал боксчи бўлиш учун мактабдаги ўқишини ташлаб кетган. Ҳаваскорлар боксида ўсмирлар Олимпиадаси ғолиби бўлган. Профессионал боксчи мақомини олгунга қадар 72 та жангда ғалаба қозонган. Мақтанчоқ боксчи мактабдан кўра рингда имконияти кўплигини таъкидлаб келади.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.