АҚШда уйи ёнғинда қолган қизалоқ 911 га қўнғироқ қилиб, диспетчерликда навбатчи бўлган онаси билан уланди. Она ўзини йўқотиб қўймади

АҚШнинг Техас штатидаги Медисон округи шошилинч хизмати (911) диспетчери Лейла Рей навбатчиликда бўлган вақти унинг уйида ёнғин юз берди, бу ҳақда эса унга ўз қизи иш телефони (911)га қўнғироқ қилиб, хабар қилди. Бу ҳақда TJournal хабар бермоқда.

Мазкур кутилмаган ва оғир қўнғироқдан аёл ўзини йўқотиб қўймади, ҳиссиётларини жиловлай олиб, раҳбариятининг қайд этишича, ўзини ҳақиқий профессионал сифатида намоён эта олди.

Рейнинг қизи Кессидининг айтишича, ёнғин уйнинг орқа қанотида бошланиб, аста-секинлик билан бутун уйни қамраб олган. Ёнғин вақтида уйда қиздан ташқари унинг отаси, укаси ва ити ҳам бўлган.

Лейла Рей: 911 эшитади, нима бўлди?Кессиди: Ойижон! Ойижон! Мен Кессидиман! Уйимиз ёняпти![...]Кессиди: Ойижон, биз ҳаммамиз ёняпмиз!Лейла Рей: Ҳаммаси яхши. Ҳаммаси яхши бўлади. Сизлар томон ёрдам йўлга чиқди. Яхшими? Яхши.

Орадан маълум вақт ўтиб, Рей фарзандларининг ёнғин сабаб ўзаро тортиша бошлаганига муносабат билдираркан, ҳиссиётларини жиловлай олмади ва: «Шуни деб бир-биринг билан гап талашиш шарт эмас! Бундан бошқа муаммо ҳам бор», - деди.

Бутун уйни кулга айлантирган ёнғин сабаблари номаълум. Ёнғин оқибатида бутун мол-мулкидан айрилган Рей оғир руҳий аҳволда эканини айтиб, журналистлар билан мулоқотдан бош тортди.

Медисон округи шерифи Тревис Нили диспетчер Рейнинг ишига юқори баҳо бериб, у каби диспетчерлар айнан шундай ҳолатлар учун маънавий ва руҳий тайёргарликдан ўтишини қайд этди.

«Ўз фарзанди қўнғироқ қилиб, шундай фожиа ҳақида айтиб турган вақти, яна қанча одам одатдагидек ўз ишини давом эттира оларкин?», - дея қўшимча қилди шериф Нили.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.