O‘zbekistonda Yong‘in xavfsizligi kunlari mobaynida yong‘inlar miqdori 20 foizga kamaydi

O‘zbekiston Respublikasi Ichki ishlar vazirligi Yong‘in xavfsizligi bosh boshqarmasi 2016-yilning 10-noyabridan 2017 yilning 10-yanvariga qadar o‘tkazilgan Yong‘in xavfsizligi kunlari yakunlarini sarhisob qildi. Bu haqda O‘zA xabar bermoqda.

— Profilaktika va tushuntirish ishlari yong‘in xavfsizligini ta’minlash borasida muhim omil hisoblanadi, — deydi O‘zbekiston Respublikasi Ichki ishlar vazirligi Yong‘in xavfsizligi bosh boshqarmasi boshlig‘i o‘rinbosari A.Sultonov. — Ikki oylik mobaynida yong‘inlar miqdori 20 foizga va buning natijasida jabrlanganlar hamda qurbon bo‘lganlar soni sezilarli ravishda kamaydi.

Sanoat, ijtimoiy va turar joy obyektlarining yong‘inga qarshi holatini tekshirish bu boradagi ishlarning muhim yo‘nalishi bo‘ldi. Jumladan, 55 mingdan ziyod sanoat va ijtimoiy obyektlarda yong‘in xavfsizligi qoidalariga rioya etish holati o‘rganilib, bir milliondan ortiq uy-joy tekshirildi va ularda yashovchi aholi bilan yong‘in xavfsizligi mavzusida suhbatlar o‘tkazildi. Aniqlangan kamchiliklar o‘z vaqtida bartaraf etildi.

So‘nggi ikki oyda 3 mingdan ziyod bino va inshootdan foydalanish vaqtinchalik to‘xtatildi, yong‘in chiqarish xavfi bo‘lgan 33 mingta turli uskuna, agregat va moslamalardan foydalanish taqiqlandi.

Yong‘in xavfsizligi kunlari davomida barcha viloyatlarda 124 yangi o‘t o‘chirish moslamasi o‘rnatilib, 345 moslama ta’mirlandi, 38 hovuz barpo etildi va 200 tasi ta’mirdan chiqarildi. Sanoat va ijtimoiy obyektlarda yong‘inga qarshi 323 taktik-o‘quv mashqlari va 4,3 ming mashg‘ulot o‘tkazildi.

Avtomobillarga yoqilg‘i quyish shoxobchalarida, shaxsiy va shahar avtotransport vositalaridan foydalanishda yong‘in xavfsizligini ta’minlashga ham alohida e’tibor qaratilmoqda. Yong‘in nazorati xodimlari barcha avtobus parklariga borib, ularning xodimlariga bu borada zarur ko‘rsatmalar bermoqda, yong‘in xavfsizligi qoidalariga rioya etilishini tekshirmoqda.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.