Дунёнинг иккинчи ракеткаси, америкалик Серена Уильямс АҚШда оммабоп бўлган Reddit сайти асосчиларидан бири – Алексис Оганян билан унаштирилгани ҳақида маълум қилди, деб хабар бермоқда Meduza.
35 ёшли теннисчи 33 ёшли Оганян билан Рим шаҳрида тасодифан танишгани ҳақида шеър ёзди. Кейин Алексис Серенани яна Римга таклиф қилди ва у ерда унинг қўлини сўради. Теннисчи бунга розилик берди.
Серена Уильямс ўз шеърини Reddit’нинг r/isaidyes – фойдаланувчилар унаштирилиш тарихи ҳақида маълумот билан ўртоқлашадиган бўлимида эълон қилди. Уильямс ва Оганян 2015 йилда учрашишни бошлаган, аммо ўз муносабатларини яширишга ҳаракат қилганди.
Маълумот учун, Серена Уильямс теннис тарихидаги энг яхши теннисчилардан бири сананади. У «Катта дубулға» туркумига кирувчи турнирларнинг 22 тасида ғалаба қозонган.
Алексис Оганян 2005 йилда Стив Хаффман билан Reddit сайтига асос солган. Reddit – интернетдаги энг оммабоп сайтлардан бири бўлиб, унинг аудиторияси 230 миллион кишини ташкил этади.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)